Aatsitassarsiornermi sulisartut maanimiut iluaquserneqarlik

Tamanna tassaavoq SIK-p siulittaasuata sulisartut ulluanni Nummi oqalugiarnermini oqariartuutaa paatsuugassaanngitsoq.

- Inatsisit Nunatsinnut iluaqusiisut pisariaqartippavut amigaatigalugillu. Takorusuppara sulisartut innutaasullu pisuussutitta isumalluutigineqarneranni pisassinneqarnissaat, taakkumi annersaat nammineq iluaqutiginiartussaagatsigit, Jess G. Berthelsen oqarpoq.

Sulisartut kattuffianni siulittaasup Nunatsinni aalajangiisartut saassutaringaatsiarapai. Tassa Inatsisartut, Naalakkersuisut aamma kommunit sisamaasut.

Inatsisiliornikkut ersarissunik piumasaqaateqartariaqarpoq, taamaalilluni avataaniit tikisitat maani najugaqartut suliffissaarusimasunngorlugit suliffissaannik arsaartuinnginniassammata.. Kommunillu tamatuma pinnginnissaanik pisussaaffitsik eqqummaariffiginerusariaqarpaat, SIK-p siulittaasua oqarpoq.

Jess G. Berthelsenip aatsitassarsiornermi uraanitalinnik piiaanngilluinnarnissamik aalajangersakkap sakkukillisinneqarsinnaanera oqaatigeqqippaa, taamaalilluni aatsitassanik uraanitaqalaaraluartunik piiaasoqarsinnaalerniassammat.

Aamma Inatsisartuni Naalakkersuisunilu ilaasortat inissianik illunillu tunisaqartarnermi attartortitsinermilu akinut tunngatillugu isumaqatigiissinnaannginnerannik appisaluuppai, taamatummi pisoqarnerani suliffissaaruttut iniminnit anisinneqartarmata.

- Taamaattorli ineqarneq pillugu politikki atugassarititaasullu naammaginanngilluinnartutut oqaatigerusuppakka, allaat inuit tamat oqartussaaqataanerannik nammaqatigiinnermillu sumiginnaanertut oqaatigisariaqarlugit,

SIK-p siulittaasua Jess G. Berthelsen ullumikkut oqalugiaammini ilaatigut taama oqarpoq.