Aatsitassarsiornermi suliffissat 1300it pilersinneqangajalersut

Aatsitassanut Ikummatissanullu Pisortaqarfiup misissueqqissaarnerit ilimanaateqarluartut tallimat pisortatigoortuunngitsumik nalunaarsorsimagai,

Sermitsiaq nittartakkamini allappoq, sunalu tamarmi ingerlalluassappat Kalaallit Nunaanni aatsitassarsiornermi ukiut tallimat qaangiuppata inuit 1.500-t sulisorineqassapput.

Isumalluarfigineqarnerpaat ukuullutik:

Uummannap eqqaani Maarmorilimmi Inngili Qernertumi aqerlussamik zinkimillu piiaaffik ammaqqippat suliffissat 110-t 2008-mi pilersinneqarsinnaassapput.

Narsap eqqaani Kangerluarsuup qinnguata kujataatungaani, Kringlerne-mik taaguutilimmi, ujaqqanik eudialyt-inik piiaaffissaq 2008-mi 2009-miluunniit ammarpat suliffiit 50-it pilersinneqarsinnaassapput.

Qeqertarsuatsiaani rubinisiorfik 2009-mi ammarpat 30-nik imalluunniit 40-nik suliffissaqartitsisinnaassaaq.

Illoqqortoormiut eqqaanni qaqqami Malmbjergimi aatsitassamik molybdænisiorfimmik 2011-mi ammaasoqarpat 600-t tassani sulilersinnaassapput.

Taavalu Kangerlussuup eqqaani, Sarfartumut qanittumi Garnet Lake-mi, diamantisiorfissamik 2011-mi ammaasoqassasoq pilersaarutigineqarpoq, tassanilu inuit 200-t 500-llu akornanni sulilersinnaassapput.

Aatsitassarsiornerit marluk maanna kisimik ingerlanneqareerput, tassa Seqinnersuusami olivinisiorneq aamma Nalunami kuultisiorfik, taakkunani sulisut katillugit 200-t missaanniipput.