Aatsitassarsiornermi suliassarsuaq aallarteqqajaavoq

Aviisimi ullormut saqqummersartumi, Børsenimi, allassimasut naapertorlugit, London Mining ukiuni tallimani kingullerni piareersarsimavoq, 300 millionit koruuninillu aningaasaleereerluni, 12 milliardit koruunillu, saviminissarsiorfissamut atortariaqagassat, tunniunnissaannut Kinamiut maanna piareerput.

Suleqatigiiffiup pisortaa, Kaj Kleist, Radioaviisimut ippassaanikkunni oqarpoq, suliniummut anguniagassatut pilersaarusiaq kinguaattooqqasoq, atuinissamullu qinnuteqaat, 600-ngajannik quppernilik, piumasaqaatillu malillugit oqaatsit pingasut atorlugit allataq qaqugu piariissanersoq suli oqaatigisinnnaanagu.

Kaj Kleist aviisimut Børsenimut, ullumi saqqummersumut, oqarpoq, qinnuteqaatip Namminersorlutik Oqartussanut aasami sulinngiffeqarnerup nalaani tunniunneqarnissaa naatsorsuutigigini.

- Akuersissut pinngikkutsigu naluara kia pissaneraa. Saviminissarsiornitsinni akoorutissanik atuinavianngilagut, Kaj Kleist oqarpoq.

Taassuma oqarnera naapertorlugu saviminissarsiornissamut suliffeqarfinnik allanik Nunanit Killerneersunit kinamiutut koruuninik milliardinik marlunnik kisitsisitalinnik aningaasaliisoqarsinnaanngilaq.

Isukasiani suliniutip aallartisarnerani 3.500-t sulisorisinnaanissaat naatsorsuutigineqarpoq, taamalu pisoqareerpat sulisut ataavartut 750-it ukiuni arlalinni piussapput.