Aatsitassarsiornermi Aningaasaateqarfik oqallisigineqaqqilersoq

Apeqqut tamanna Inuit Ataqatigiit sinnerlugit Inatsisartuni ilaasortap, Naaja Nathaniesenip, Inatsisartuni ualimut oqallisigineqarnissaa kissaatigaa. Taannami Aatsitassarsiornermi Aningaasaateqarfiup siunissami uninngasuutissaasa ukiumut qanoq atorneqartarsinnaanerat pillugu ersarissumik maleruagassiortoqartariaqartoq isumaqarpoq.

- Qulakkeerusupparami kinguassaatta aamma pissaqarnissaat. Tassa aningaasat Aatsitassarsiornermi Aningaasaateqarfimmut isaatinneqartussat killeqanngitsumik atorneqannginnissaat, taamaallaalli ilaannaasa atorneqarnissaat, Naaja Nathanielsen Inuit Ataqatigiinnersoq oqarpoq.

Taamaattumik Naaja Nathanielsenip Aatsitassarsiornermi Aningaasaateqarfiup siunissami uninngasuutissaasa qanoq annertutigisumik ilanngarneqartarnissaat pillugu Inatsisartut isummersortikkusuppai:

- Taamaattumik maanna siunnersuutigaara taarsiullugu oqallisigissagipput aningaasat uninngasuutigineqalertussat qanoq annertutigisumik atuiffigisassanerigut. Tassa kisitsimmik aalajangersimasumik isumaqatigiissuteqarsinnaanersugut. Imaluunniit aalajangersaasinnaanersugut qanoq annertutigisumik aningaasateqarfik tigusiffigisassaneripput, uninngasuuteqartuarnissaa qulakkeerniarlugu, Naaja Nathanielsen oqarpoq nangillunilu:

- Aningaasaqarnermut Siunnersuisoqatigiit allapput Aatsitassarsiornermi Aningaasaateqarfinnut allanut sanilliullugu Kalaallit Nunaanni Aatsitassarsiornermi Aningaasaateqarfiup uningaasuutissaasa atorneqarnissaannut maleruagassat ersernerluttut siammasippallaartullu. Tamannalu ulorianarsinnaasoq aamma isumaqarlutik. Tassa aningaasat kukkusumik atorneqarsinnaasut. Taamaattumik sukaterisoqarnissaa innersuussutigivaat. Soorlu norskit Ikummatissanut Aningaasaateqarfiata maleruaqqusai aamma qiviarneqarsinnaasut innersuussutigalugu. Norskimmi aalajangiussimavaat aningaasateqarfiup uninngasuutaasa erniaat kisimik atorneqartassasut, Naaja Nathanielsen oqarpoq.

Naaja Nathanielseni aningaasat qanoq annertutigisut atorneqartassanersut siunnersuutigeqanngilaq, kisiannili Aatsitassarsiornermi Aningaasaateqarfiup uninngasuutissai qanoq atorneqartassanersut oqallitsitserusulluni:

- Ataasiaannarlutami aatsitassat qaqissinnaavagut. Aatsitassat qaqinneqareerpata iluanaarutigeqqissinnaanngilagut. Taamaammat aatsitassiornermit isertitassatta isumatusaartumik aqunnissaat pisariaqarpoq, Naaja Nathanielsen oqarpoq.

Naaja Nathanielsenip Inatsisartut ukiaanerani ataatsimiimmata siunnersuutigaluarpaa Aatsitassarsiornermi Aningaasaateqarfiup aningaasat uninngasuutissaasa erniaasa kisimik atorneqartarnissaat. Kisianni Inatsisartuni amerlanerussuteqartut siunnersuutaa ilalinngilaat.