Aatsitassarsiorneq isumakuluutigineqartoq

Aatsitassanik ujaasinermi misissuisarfiup Tranbreezip kujataani sulinera sumut killinnersoq Siumumeersup Suka K. Frederiksenip apeqqutigaa. Taanna naapertorlugu suliffissaaleqineq pissutigalugu innuttaasut Kommuni Kujallermit noorarput, tamannalu allanngortinniarlugu aatsitassanik ujaasinermi misissuisarfiup sulinera aallartinneqaqqittariaqartoq Suka K. Frederiksen isumaqarpoq.

Randi Vestergaard Evaldsenip Suka K. Frederiksenimut erseqqissaavoq Naalakkersuisut aatsitassanik ujaasinermi misissuisarfik misissuinissamik qinnuteqarsimasoq maannalu oqaloqatigineqartoq.

Olivinisiorfik ammarneqaqqissava?

Atassummeersoq Siverth K. Heilmannip Qeqqata Kommuniani aatsitassarsiornerup tungaatigut suliat sumut killinnersut aamma apeqqutigai, tassungalu Randi Vestergaard Evaldsen akivoq Maniitsup kujataani olivinisiorfissap ammaqqinnissaanut qinnuteqaat suliarineqaleruttortoq.

Unnerluut sukannersoq Inuit Ataqatigiinneersup Muté Bourup Egedip saqqummiuppaa, taassumammi oqaatigaa Aatsitassaqarnermut Naalakkersuisoqarfiup suleriaasaa arriippallaartoq.
Muté Bourup Egede naapertorlugu sullissinissamut piffissaliussaasartoq qaangerneqartarpoq, oqarasuaatikkullu saaffiginnittut akineqannginnissaat siunertaralugu oqarasuaat iliinnarneqartarpoq.

Taamaattumik naalakkersuisoqarfimmi atorfilittat oqaloqatiginiarlugit naalakkersuisup Randi Vestergaard Evaldsenip neriorsuutigaa. 
Nassuerutigivaali suliat ilaannikkut arriippallaartumik suliarineqartartut, tamannalu sulissutigissallugu oqaatigaa naqissuserlugulu naalakkersuisoqarfik ammasuusoq erseqqissaatigalugulu nammineq oqarasuaat iliinnarneqartartoq tusarsimanngisaannarlugu .

Ukioq manna sinerissap qanittuani saarullittassiissutigineqarsimasut aalisarneqareersimanerat IA-mit, Atassummit Partii Naleqqamiillu ernummatigineqarpoq.

Imaani pisuussutit atorluarneqassasut Siverth K. Heilmannip kajumissaarutigaa.