Aatsitassarsiorfeqalernissaq illersornissamut suliallit unamminartoqartippaat
Qallunaat Sakkutooqarneq pillugu Ilisimatusarfianni misissukkanik naliliisartutut atorfilik, sakkutuut naalagaaraat, major Henrik Jedig Jørgensen siunissami assigiinngitsunik ajutoortoqariataarsinnaanernik qaammatini tulliuttuni misissueqataallunilu nalunaarsueqataassaaq.
Kalaallit Nunaanni avinngarusimasuni aatsitassarsiorfissat sanaartorneqarneranni inuit arlalinnik tuusintillit, qaarusunnik aallartisaasut, talittarfiliortut allallu sulisussaassapput. Aatsitassarsiornerillu aallartippata inuit immaqa tuusintit missaaniittut suleqatigiittussaassallutik.
- Tamakkunani avingarusimasuni soorlu toqutsisoqarpat imaluunniit peruluttoqalerpat qanoq iliortoqartassava? Suliassat tamakku naalagaaffeqatigiinnerup iluani kikkut akisussaaffigissaneraat maannangaaq inissitsitertariaqarpavut, Henrik Jedig Jørgensen oqarpoq.
- Maannakkut soorlu annaassiniartoqartillugu Illersornissamik suliallit politiinut ikiuuttarput. Sinerissamilu alapernaarsuineq sakkutuut imarsiortut akisussaaffigaat. Siunissami annaassiniartoqassatillugu kikkut qanoq suleriaaseqassanersut maannangaaq aalajangersuiffigisariaqarparput. Kalaallit Nunaanniit tamakkua tamarmik siunissami nakkutigineqalissappat, imaluunniit Qallunaat sakkutooqarnermut qullersaqarfiannit sakkutuunik amerlanerusunik upalungaarsimatitaqalissappat. Imaluunniit assigiinngitsutigut sakkutooqarnerit aggualullugit nakkutilliisoqalertariaqassava? Tamakkua qulakkeereertariaqarpavut. Henrik Jedig Jørgensen oqarpoq.
