'Aatsitassanut Pisortaqarfik asuleerpoq'
Nunatta Kitaani qilleriviusussani avatangiisinik misissuisarneq sumiiffinnut allanut misissuinernut naleqqiutissagaanni pipallataavallaartoq ippassaq radioaviisimi saqqummiupparput.
Aatsitassaqarnermut pisortaqarfiup suleriaasaa maanna kattuffinnit arlaqartunit uparuartorneqalerpoq:
- Tassa Avataminngaanniit arlaleriarluta uparuartortarsimavarput taamatut misissuisitsissagaanni piffissaq sivikippallaartoq, nunatsinni qaammatit pingasut atorneqarsimapput taamatullu nalilersuisitsiniarnermik naliliinissamut aatsitassanik pisortaqarfimmiit misissuititsinissaq sivikippallaarpoq, Avatami siulittaasup tullia Pîtánguak' Tittussen oqarpoq. Taakkartorlugulu nunatta kitaani misissuisitsinerit qaammatit sisamaannaat ingerlanneqarsimasut allanilu aatsaat ukiut pingasut sinnerlugit avatangiisinut naliliisitsilluni misissuisitsisoqareeraangat qillerinerit aallartinneqartarmata.
ICC-mi avatangiisit pillugit suliani siunnersorti Parnuna Egede aamma isumaqarpoq misissuinerit pipallataavallaartut :
- Isumaqarpugut piffissakilliorluni sukkavallaamik sulianik ingerlatsisarnerit ajorpallaartut. Inuiaqatigiinnut pisariaqarpoq suliamut attaviitsumik attuumassuteqanngitsumillu misissuisitsinissaq ingerlanneqassasoq, Parnuna Egede oqarpoq nangillunilu ernummatigalugu pipallannerup sukumiinerusumik ajornartorsiutaasinnaasut nalilerneqanngitsoortissinnaagai.
Oqartussanit uuliasiortunillu pipallanneq avatangiisitta mingutsinneqaratarsinnaanera Parnuna Egedep ernumassutigaa:
- Sukkavallaamik pappiararsorneq ingerlanneqartassappat, inuiaqatigiinnillu akuliuffigineqanngippata misissuinernullu piffissaqartoqanngippat avatangiiserput pissarsiorfissagullu ulorianartorsiortittuassavagut, ajornermik kinguneqaratarsinnaalluni, Parnuna Egede oqarpoq.
Taamaattumik ICC-p nunatta kitaani uuliasiorluni qillerinerit nalorninartoqartippaat, isumaqarlutillu avatangiisinut naliliinermik misissuinerit minnerpaamik ukiuni arlalinni ingerlanneqartassasut, uani pineqartumi DMU-p Pinngortitaleriffiullu misissuisitsinera qaammatini pingasuni sisamanilu ingerlanneqarsimasut assigeqqunagit.
Avatallu ammasumik malinnaaqataasinnaasoqarnissa ujartorpaa. Siulittaasup tullia Pîtánguak' Tittussen isumaqarpoq, apeqqutit akineqanngitsut amerlavallaartut:
- Soorlu sajuppillatsitsilluni misissuisarnerit, seismiske undersøgelsinik taaneqartartut, uumasoqarnermut puisinut allanullu arfernut suna kingunerisarpaa? Pîtánguak' Tittussen aperaaq nangillunilu:
- Uuliamik maqisoortoqassagaluarpat Aatsitassanut pisortaqarfimmit qanoq iliortoqarniarpa? Pîtánguak' Tittussen oqarpoq.
Avatap siunnersuutigaa pisortaqarfiit marlunnut avinneqassasut, aatsitassanut pisortaqarfiup akuersissutinik tunniussuisarnissaq isumagilissagaa, norskillu ilaarlugit orsussat pillugit nakkutilliiveqalissasoq, avatangiisinut tunngasut taassuma ataaniilersillugit. Taama iliornikkut suliassat immikkoortinneqassapput ammaassinissaq attuumassuteqannginnissarlu tassuuna anguneqassalluni.
