Aatsitassanut Naalakkersuisoq kujataani illuatungilerneqarpoq
Kirkegaard aggustip qaammataani Narsamiimmat urani pillugu innuttaasunik taasitsitsoqassanngitsoq oqaatigineqarpoq, kingornali tamanna allanngortinneqarluni. IA sinnerlugu kommunalbestyrelsimut ilaasortap Narsameersup Avaaraq Olsenip Kirkegaardip iliuusai eqqumiigalugillu paasiuminaatsippai.
- Uanga paasiuminaatittorujussuuvara suli isumaqartoqassappat Narsarmiut taamaallaat aalajangiissasut. Naalakkersuisut isumaqarneramik innuttaasut uranitaqarfiusuni allani oqartussaaqataanngitsut? Naalakkersuisut isumaqarneramik Kalaallit Nunaanni innuttaasut sinneri oqartussaaqataanngitsut?, Avaaraq Olsen aperivoq.
Naalakkersuisut nalunaarusiaanni kingullermi nunap assingani takutinneqarpoq Attu, Nassuttooq, Sarfartooq, Qaqqaarsuk, Ivittuut, Puissattaq, Illorsuit, Milne Land aamma Randbøldal uranitaqarfiusut. Taamaammat Narsamiinnaq taasissutigineqarnissaa eqqumiippoq.