Aatsitassanut Ikummatissanullu Pisortaqarfiup angut nuna allamiu rubiininik anngiortumik annisseriaraluartoq nammineq politiinut nalunaarutigaa

Pisoq taanna apeqqutinik arlalissuarnik pilersitsivoq. Ujaqqat erlinnartut kuultilu pillugu inatsit maanna atuuttoq ajunngila?

Aatsitassanut Ikummatissanullu Pisortaqarfimmi pisortaaneq, Jørgen Skov Nielsen, ilerasuuteqanngilaq.

-Uani pisumi erserluinnarpoq, inatsisit ingerlatseriaaserlu pissusissamittut ingerlasut, Jørgen Skov Nielsen oqarpoq:

-Pisoq ilungersunarpoq, tassami akuersissummik peqqaarani ujaqqanik erlinnartunik Kalaallit Nunaanniit annisseriaraluarpoq. Tamanna aatsitassat pillugit inatsimmik unioqqutitsineruvoq, aatsitassammi pillugit inatsimmi erseqqissumik allassimavoq Aatsitassanut Ikummatissanullu Pisortaqarfimmit akuersissummik aatsaat peqaraanni Kalaallit Nunaanni aatsitassarsiortoqarsinnaasoq, Jørgen Skov Nielsen oqarpoq, nagillunilu:

- Aatsitassarsiorniaraanni akuersissutissarpassuit pisariaqarput, oqartussaasut ilisimaniassammassuk aatsitassarsiorneq ujarassiornerluunniit pissusissamissut ingerlasut.

Tamanna aaqqiineq ilumut atorsinnaanersoq qanoq ilillugu qulakkeerneqassanersoq aperineqarami Jørgen Skov Nielsen akivoq:

-Atorsinnaalluarpoq, unami pisoq assersuutissaqqippoq, tassami nakkutiginninnerput ima pitsaatigaaq, angut anngiortumik annisseriaraluartoq unitsinneqarsinnaasimalluni, angullu taanna piffissami sivisujaami uagut alapernaasersimavarput, pasitsaakkatsigu arlaannik suniartoq, Aatsitassanut Ikummatissanullu Pisortaqarfimmi pisortaaneq, Jørgen Skov Nielsen, oqarpoq.

Naggataagullu oqarpoq Aatsitassat pillugit inatsimmi paragraf 32-mi allassimasoq Kalaallit Nunaanni innuttaasut aatsitassanik annikitsunnguanik katersisinnaasut, kisiannili annertuumik aningaasarsiutigissanngikkaat.

Nunatsinni eqqumiitsuliortut ujaqqanik erlinnartunik kuultimillu suliaqartartut ernummatissaqanngitsut, Jørgen Skov Nielsen oqarpoq.