Aatsitassanut Ikummatissanullu Pisortaqarfik piareersaasiulerpoq
Uulia 10.000 mia. koruuninik nalilik Kalaallit Nunaata avannaani imartamiippoq. Tamannalu Danmarkip ukiumoortumik nunatsinnut tapiissutaasa 3.000-t naligaat.
Tunup avannaarsuata uuliaqassusianik amerikamiut ujarassiuutut misissuiffiata USGS-p paasiniaanerata takutippaa peqarluartoq, allaallu uulia naturgassilu nappartat 31 milliardit missaanniittoq nassaassaasoq, aviisimi Jyllands-Postenimi taama allaaserinnittoqarpoq.
Nunarsuarmi uuliaqarfiit pingaarnerit 500-t allattorsimaffianni Tunup avannaarsua nr. 19-itut Amerikamiut USGS-ikkut inissippaat.
Uuliaqarneranik gasseqarneranillu sukumiisumik misissuinissat Aatsitassanut Ikummatissanullu Pisortaqarfimmi pisortamut Jørn Skov Nielsenimut apeqqutigigatsigu, oqarpoq, tassa maanna piareersaasiorlutik aallartereerlutik, 2008-p naajartulernerani politikerinit naliliiffigisassamik.
Misissuinissat Kalaallit Nunaata avannaata kitaani kangianilu imartami pisussaapput, misissuinissallu tunngavissarsiorlugit, Danmarkimi Kalaallit Nunaannilu ujarassiuutut misissuiffik GEUS aamma Pinngortitaleriffik suleqatigalugit avatangiisinik misissuisoqartussaavoq.
- Ukiuni tulliuttuni 20 millioni koruuninik atuinissarput ilimagaarput, taakkulu aningaasat sukumiisumik pinngortitamik avatangiisinillu misissuinissanut atorneqassapput. Qulakkeertariaqaratsigu uuliamik misissuisussarsiunnginnitsinni avatangiisinik innarliinnginngissamut suut eqqumaffigineqassanersut, Jørn Skov Nielsen oqarpoq.
Jørn Skov Nielsenip ilimagaa Tunup avannaarsuani siusinnerpaamik 2010-2011-imi uuliaqassutsimik gasseqassutsimillu misissuisoqalersinnaanera.
- Kisianni politikerit qanoq isummernissaat piffissaliinermi apeqqutaalluinnassaaq, nassuiaavoq.
Aatsitassanut Ikummatissanullu Pisortaqarfimmi pisortap ilanngullugu oqaatigaa, paasissutissat amerikamiut saqqummiussaat nunarsuarmi uuliasiornermik suliaqartut annerit assut soqutigigaat, uuliasiortullu tamakku tamaasa attaveqarfigisalereeritik.
USGS-p naliliinera malillugu, Tunup avannaarsuata imartaani uuliap annertussusia, Nordsømi tamarmi uuliaatigineqartup pingajorarterutigaa. Nordsø Danmarkip, Norgep, Tuluit Nunaata, Tysklandip Hollandillu imartaqarfigaat.
