Aatsitassanut allaffik pilersinniaraat

Aatsitassat pillugit sulisoqarniarnerillu sunniuteqarfiginissaat allaffimmik pilersitsinermut tunngavigineqartut, Sisimiut Kommuneani borgmesteri Hermann Berthelsen oqarpoq.

- Allaffeqarfinnguamik pilersitserusussimavugut isumaqaratta Maniitsoq Sisimiullu kommunerujussuanngoruni taassuma tungaatigut pisuussutai annertoorujussuussasut, taamaammat isumaqarpugut sunniuteqarsinnaanerput annerpaamik malinnaaffigeqataallugulu aalajangeeqataaffigissagutsigu taava ulluinnarni ingerlatsisoqarfeqartariaqarluta, Hermann Berthelsen oqarpoq.

Taanna erseqqissaavoq qanoq peqartigisoqarnera ilisimasariaqaramikku taama pilersitserusussimallutik.

Taanna nangilluni erseqqissaavoq sulisut nunatsinni atorneqartut qanoq aqunneqarnerisa malinnaaffigalugulu ilisimanissaat pingaarmat taama pilersitsiniarneq ilaatigut tamatuminnga tunngaveqartoq.

Hermann Berthelsen aamma oqarpoq isumaqarlutik suliassamik tamatuminnga Namminersornerullutik Oqartussat kisermaassiniassanngitsoq.

- Uagut kommuneni innuttagut tikillugit sulisuuvugut, taakkulu suliassat pineqartut innuttat akornanni suliassaammata isumaqarpugut tassuuna pikkorinnerusinnaalluta, Hermann Berthelsen oqarpoq.

Taanna erseqqissaatillugu aperaarput aatsitassarsiorusuttunik akuersisuunatik suliaqartunilli malinnaasuuginnassanersut.

- Aap, isiginnaartuuginnannginnissarpununa pillugu aammalu qanoq sulisussarsiortarneq ilinniartitsisarnerlu malinnaavigerusukkigut taamaalilluta maani najugaqavissut annertunerpaamik sunniuteqarsinnaanerat pillugu taanna allaffeqarfinnguaq pilersinniaripput, Sisimiut Kommuneani borgmesteri Hermann Berthelsen oqarpoq.