Aatsitassanik agguataarinissaq oqallisigaat

Namminersorneq pillugu Isumalioqatigiissitap Kalaallit Nunaanni Aningaasaqarneq Inuutissarsiornikkullu Siuarsaaneq pillugu ataatsimiititaliaa, arfineq-pingasunik ilaasortalik, Københavnimi ullumi nalunaaqutaq ataatsimut (nunatsinni 09.00), ataatsimiilluni aallartissaaq.
Allattoq Louise M. Kleemann
marsip 12-at 2008 06:19

Ataatsimiinnissaq siusinnerusukkut kinguartinneqareerpoq Folketingimut qinersineq pissutigalugu kiisalu Nunatsinni Aatsitassat pillugit qanoq agguataarisoqassanersoq suli aaqqiivigineqanngimmat.

- Tullianik ataatsimiittoqarnissaanut apeqqutinik kinguartitsissutaasinnaasunik takkuttoqarnissaa ilimaginngilara, tamannali nalunarluinnarpoq. taamatuttaaq ullumikkut ataatsimiinnissap qanoq sivisutiginissaa qanorlu inerneqarnissaa nalunarpoq, Steen Ryd Larsen Namminersorneq Pillugu Isumalioqatigiissitap allattaata KNR-imut erseqqissaavoq.

Ritzauip Nutaarsiassaqartitsiviani ataatsimiinnissaq tulleq ullulerneqarsimavoq, tamannali eqqunngilaq.

- Isumalioqatigiisitaq suleqatigiissitallu ataatsiminnissaat tulleq suli ullulerneqanngilaq, Steen Ryd Larsen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq