Aatsitassalerinermik Ilinniarfimmi ilinniarfiit nutaat
Ilinniarfiit nutaajusut Kirkenes Videregående Skole Norgemiittoq suleqatigalugu pilersinneqarput. Suleqatigiinnermullu tunngaviusut marluupput. Tassalu ilinniarfimmi nunat assigiinngitsut akornanni pitsaassuseq ilinniarfimmi ilinniartitsissutigineqarnissaa qulakkeerniarlugu, aappaattullu ilinniartut ilinniarnerminnik skandinaviap iluani ingerlatitseqqiisinnaanerat qulaakkeerniarlugu.
-Norskit atuartitseriaasaat malillugu ilinniartitsissaagut, tamannalu pissusissamisoorpoq. Tassami ilinniarfiit nutaat pilersinneqarneranni norskinik suleqateqarpugut. Ilinniakkani ukunani nutaajusuni Danmark suleqatigisinnaasimanngilarput, taakkumi Danmarkimi ilinniarneqarsinnaanngillat. Ilinniartut ilinniakkani taakkunani aallartitussat 24-it tiguneqarsimapput. Taakkulu immikkut tamarmik aqqaneq marlunnik amerlassuseqarlutik ilinniartussaassapput.Tassalu tullinnguuppoq taakku ilinniartilluarneqarnissaat, Hans Hinrichsen Aatsitassalerinermik ilinniarfimmi pisortaq taama oqaluttuarpoq.
Ilinniarfiit nutaat pilersinneqarneranni Ilinniartitaanermut Naalakkersuisoq Palle Christiansen Aatsitassanik Ilinniarfimmit pulaartorineqarpoq.
-Nuannaarutigaara ilinniarfiit nunat allat assigalugit qaaffasissuseqartut aallartinneqarnerat. Suliffissaqarniarlusimi unammillersinnaanngorpusi, ilinniarnissinnilu ikiuunniarumaarpugut, ilissilumi ilinniakkassi naammassinissaanik neriorsuisariaqarpusi, Palle Christiansen ilaatigut taama oqarpoq.
Aatsitassarsiorneq eqqarsaatigalugu siunissaq isumalluarnarpoq. Aatsitassarsiorfinnilu sulisussatut ilinniarfik nutaaq maanna isumalluarnermut aqqutissiisuuvoq.
-Manna tikillugu taamaallaat gultisiortfeqarpoq. Tamannali siunissami allanngorsinnaavoq. Taammaattumik aatitassarsiorfinni sulisussatut ilinnialertut siunissaq qaninnerusoq eqqarsaatigalugu atorfissaqartinneqassaqaat.Ilinniarfimmilu uani ilinnialertussat tuluttut ilinniartinneqartussaassapput. Tamannalumi pitsaaquteqaannarpoq, tassami aatsitassarsiorfiusuni sulisut arlallit tuluttut oqaluttuusarput, taamaattumillu pingaaruteqarpoq ilinniartut tuluttut ilinniartinneqarnissaat, Hans Henrichsen taama oqarpoq.
Ilinniarfiit nutaat pilersinneqarnerini Qeqqata Kommuneani Borgmesteri qungujussaqarluarluni nuannaarutiginnippoq. Sisimiunimi ilinniarfissat amerlineqarneri nuannaarutigilluarpaa.
-Tusaaneqarsinnaavoq nunanit tamanit aggersunik manna ilinniarfiusoq, maanimi isersimanitsinni oqaatsit assigiinngitsut atorneqartut tusaasinnaavarput. Maannga Sisimiunut tikilluaqqusinnaagassi nuannaarutigeqaara, neriuppungalu maani innuttaasunut atassuteqarlualerumaartusi. Ilinniagassarsi maani Kalaallit Nunaanni atorfissaqarteqaarput, suleruluttussaavusimi. Eqqaamassavarsilu aamma ilaanni immissinnut freertilaartassagassi, Borgmesteri qungujulluni taama oqarpoq.
Aatsitassarsiornermik Ilinniarfimmi maskiinat atorlugit sulliviusuni ilinniarsimasunik ilinniartitsineq nutaajulluinnarpoq. Tamakkunanimi sulisut ilinniarsimasuunngitsut pikkorissartinneqartarneri kisimik misilittagaqarfiupput.
-Maanna maskiinat atorlugit sulliviusuni ilinniarsimasunik sulisoqarsinnaanngussaagut. Siusinnerusukkut Danmarkimut pikkorissartitsi- artortarsimavugut. Maannalu piriarfissaqalerpugut inuusuttut nunatsinni taama ilinniagaqarsinnaanngornerannut, tamannalu nuannaarutissaavoq,Hans Hinrichsen oqarpoq.
