Aatsat taama annertutigisumik nipilersornermik festivalertoqassaaq

Nipilersukkanik saqqummersitsisarfik, Atlantic Studio, oktobarip ulluisa 31-anni ukiunik qulinngortorsiorluni nalliuttorsiussaaq, tamatumunngalu atatillugu Kalaallit Nunaanni aatsaat taama annertutigisumik nipilersornermik festivalertoqassaaq, nipilersortartut erinarsortartullu 20-t peqataassallutik.
Allattoq Louise M. Kleemann
oktobarip 08-at 2008 13:43

Erinarsortartut nipilersortartullu Nuummi timersortarfimmi, Piorsarsimassutsikkullu illorsuarmi, Katuami, oktobarip ulluisa 31-anniit novembarip ulluisa aappaat ilanngullugu aliikkusersuissapput.

Kalaallit Nunaanni erinarsortartut nipilersortartullu tusaamaneqarnerpaat festivaleqarnerani peqataasussat ilaat soorlu makkuupput; Ole Kristiansen, Alter Me, Zikaza aamma DDR, taakkulu nalunaaquttap akunnerini 20-t missaanni aliikkusersuissapput.

Nipilersorneq pillugu Europami atuagassiat tusaamasaalluartut ilaanni sulisut, soorlu Rolling Stones, Spiegel, Stern aamma Focus festivalimi aamma peqataatitaqassapput. Atlantic Studio, Katuaq aamma Shotokan Karate Do aaqqissuussinermi suleqatigiipput. Julie Berthelsen Nuummi Timersortarfimmi aqutsisuussaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq