Aatsaat taama angusarissaartigaaq

Ukioq 2010 Polar Seafoodimut aatsaat taama angusarissaarfiutigaaq, tassami siorna naatsorsuutimini 150 millionit koruuninik sinneqartoorami.
Allattoq Elisa Isaksen
juunip 04-at 2011 13:04

Aalisakkanik tunisassiorfiup ukiuni 27-ni atuunnerani naatsorsuutitigut aatsaat taama angusarissaartigisoqarpoq. Sermitsiami taama allaaserinnittoqarpoq.

Naatsorsuutit suli tamanut saqqummiunneqanngillat, siulersuisunilli akuerineqareersimasut oqaatigineqarluni. Suliffeqarfiup siulersuisuini siulittaasup Svend Erik Danielsenip Sermitsiamut oqaatigaa, 2010-mi naatsorsuutit 2009-mi naatsorsuutinit 543 procentimik pitsaanerusut, taamanimi sinneqartoorutit akileraarutinik suli akiliinnginnermi 20,2 millionit koruuniummata.

Siulersuisuni siulittaasup taamatut angusarissaarnermut kaaviiaartitat amerlisimanerat pissutaanerarpaa. Ilaatigut Kinamiunut Russinullu tunineqartartut amerleriarsimapput. Soorluttaaq Mexicop Kangerliumanersuani uuliasiornermi ajutoornerup kinguneranik, taassuma avataani imaaneersunit tunisassiat piumaneqarnerulersimasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq