Aatsaat taama amerlatigisunik katersuiniartoqarpoq

Afrikami kaattut ikiorniarlugit aningaasanik TV-kkut katersuiniarnermi aningaasat naatsorsuutigisamit amerlanerujussuit katersorneqarput, tassa katillugit 110 millionit koruunit katersorneqarput.
Allattoq Jaaku Lyberth
aggustip 28-at 2011 14:38

TV-kkut aallaakaatitsinerup ingerlanerani aningaasanik tapiissuteqarusullutik sianertut 12.000-it sinnerlugit amerlassuseqarput, TV aqqutigalugu katersuiniarnerni aatsaat taamak amerlatigisut sianersimallutik.

Suliffeqarfiit tapiissuteqartut atii 1600-t sinneqartut TV-kkut aallakaatitsinermi saqqummersinneqarput, aamma taakkua amerlassusaat siornatigut nallerneqarsimanngilaq, suliffeqarfiit kisimiillutik tapiissuteqartut akornanni aningaasanik amerlanerpaanik tunissuteqarpoq  Bestseller, 5 millionit koruuninik tapiissuteqarami.

- Ajunaarnersuaqarnerani  Danmarkimi aningaasanik katersuiniartarnerni  aatsaat taamak amerlatigisut katersorneqarput, tassa aningaasat 110.013.903 koruunit  katersorneqaramik, tamannalu tupaallaatigisorujussuullugulu nuannaarutigaarput, Kenneth Øhrberg Danmarkimi Røde Korsimeersoq oqarpoq. Taanna Afrikami kaattut ikiorniarlugit katersuiniarnermi Afrika Nu-mi kattuffiit sinnerlugit oqaaseqartartuuvoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq