Aatsaat taama amerlatigisunik katersuiniartoqarpoq
TV-kkut aallaakaatitsinerup ingerlanerani aningaasanik tapiissuteqarusullutik sianertut 12.000-it sinnerlugit amerlassuseqarput, TV aqqutigalugu katersuiniarnerni aatsaat taamak amerlatigisut sianersimallutik.
Suliffeqarfiit tapiissuteqartut atii 1600-t sinneqartut TV-kkut aallakaatitsinermi saqqummersinneqarput, aamma taakkua amerlassusaat siornatigut nallerneqarsimanngilaq, suliffeqarfiit kisimiillutik tapiissuteqartut akornanni aningaasanik amerlanerpaanik tunissuteqarpoq Bestseller, 5 millionit koruuninik tapiissuteqarami.
- Ajunaarnersuaqarnerani Danmarkimi aningaasanik katersuiniartarnerni aatsaat taamak amerlatigisut katersorneqarput, tassa aningaasat 110.013.903 koruunit katersorneqaramik, tamannalu tupaallaatigisorujussuullugulu nuannaarutigaarput, Kenneth Øhrberg Danmarkimi Røde Korsimeersoq oqarpoq. Taanna Afrikami kaattut ikiorniarlugit katersuiniarnermi Afrika Nu-mi kattuffiit sinnerlugit oqaaseqartartuuvoq.