Aatsaat qilalukkanik pisanik qimatsisoqalinngilaq
Qilalukkat 30-t sinnerlugit amerlassusillit tuugaavi, mattai neqaasalu ilaannaat peeriarlugit, Illoqqortoormiut eqqaani piniariartarfimmi qimaannarneqarsimasut, ungasinngitsukkut sammineqangaatsiarput. Maanna paasinarsivoq aatsaat taama pisoqalinngitsoq. Sermitsiap nittartagaani tamanna atuarneqarsinnaavoq.
septembarip 05-at 2008 06:34
Qilalukkat aqqanillit toqungasut takornarniat Illoqqortoormiut eqqaanni piniariartarfimmi, Hjørnedalimi, 2005-imi naammattoorsimavaat. Hjørnedal Illoqqortoormiunit 275 kilometerit missaannik kippasissusilimmiippoq.
Umiarsuarmi takornarniartaammi "Professor Molchanovimi", ilaasut inuttallu piniariartarfik qilalukkanik ilanngalaaginnakkanik qimatsivigiinnarneqarsimasoq, naammattoorsimavaat.
-Ilaatigut takuarput illaaq attorneqarsimanngitsoq. Ersarilluinnarpoq qilalukkap tuugaavi, ilaanneeriarlunilu niaqui ilanngullugit piiarneqarsimasut, umiarsuarmi takornarniartaammi 2005-imi pisortaasoq, Morten Jørgensen, nassuiaavoq.
