Aatsaat ajunaartoqalinngilaq

Ippassaq Radioaviisimi oqaluttuaraarput, kilisaammi Markusimi isumannaallisaaneq amigartumik atuutsinneqartoq, tamatumalu kinguneranik inuttaq ajunaarpoq.

Danmarkimi Imarsiornermik qullersaqarfiata misissuinerani paasinarsivoq, sullivimmi nakkutilliinermik naliliinermik malittarisassamik amigaateqartoqarsimasoq.

Sullivimmi nakkutilliinermik naliliinermi malittarisassanik amigaateqarneq pissutaalluni ukioq manna siullermeersumik kilisaammi aatsaat ajunaartoqanngilaq.

2006-imi kilisaammi Manumi ajunaartoqarnerata kingorna, Imarsiornermut qullersaqarfimmi misissuisartut paasivaat, kilisaammi tassani naalakkap ilisimasimanngikkaa, sullivimmi naliliineq suunersoq aammalu takussutissamik kilisaat peqarsimanngitsoq.

Imarsiornermik qullersaqarfiup misissuinerani siullermi, tassa 2004-mi, Manumi sullivinni isumannaallisaanermik malittarisassamik peqarsimasoq ilisimagaluarpaat, tamatumali kingorna taamaattumik Manu takussutissaqarsimanngilaq.

Kalaallit Aalisariutaanni angisuuni 2001-imiit mamannamut 17-eriarluni sulinikkut ilungersunartumik ajutoortoqarsimavoq, taakkunannga sisamat ima ilungersunartigalutik allaat toqumik kinguneqarlutik. Imarsiornermik qullersaqarfiup kilisaatit nunatsinneersut pillugit nalunaarusiaanik misissuinissakkut tamanna erserpoq.

Kilisaammik Markusimik piginneqataasoq, Søren Brandt, Radioaviisimit oqarpoq, nammineq Kalaallit Nunaanni Sulisitsisut Peqatigiiffianniit, GA-miit, oqarfigineqarsimalluni, sullivinni naliliinernik sanasussaatitaanatik.

- Aperinikuuvugut. Qulakkeerusumallugu ilumut taamaannersoq, GA apinikuuarput, Søren Brandt Radipaviisimut oqarpoq.

GA-miit ullup qeqqata siorna pisumut uunnga oqaseqarniaratik nalunaarput.