Aasivik 77 pillugu filmiliaq siullerpaamik takutinneqalersoq
Filmimi Qullissani 1977-imi Aasivittoqarnera oqaluttuarineqarpoq, filmilu nunatsinni siornatigut tamanut takutinneqarsimanngilaq.
Filmi ukiorpassuarni nassaarineqarsinnaasimanngilaq, Aavittarnernilli pilersitsisut ilaata Aqqaluk Lyngep sisamanngorpat 70-iliinissaanut atatillugu filmip kopiianik nassaartoqarsinnaasimavoq, taannalu Katuami unnugu nalunaaqutaq arfineq-marlunut takutinneqassaaq.
Filmiliornermi assiliisuusoq Teit Jørgensen najuutissaaq, taannalu assilisaminik aamma saqqummersitsissalluni, taakkulu akornanniipput illoqarfiup aamarsuarsiorfiup Qullissat 1972-imi ulluni matuneqarfiani assilineqarsimasut. Teit Jørgensen taamani aamma Qullissaniippoq filmip "Naalakkersuisut oqarput tassagooq" suliarineqarnerani assiliisuulluni.
Aasivik 77 nunatsinni nipilersornikkut aamma pinngorarfiuvoq, ilaatigut Fali, Kasper Leolu, tusaamaneqarluartorlu Lallaali siullerpaamik tassani sassarmata, aamma qilaatersortartut tunumeersut qangatut qilaatersoriaatsiminnik Kitaani siullerpaamik takutitsiffigaat.
