Aasiannit Ikamiunut ulluni arfineq marlunni

Qeqertarsuup Tunuani nunaqarfimmiut angerlamut ilaatigut sapaatip akunnera utaqqisariaqartarput. Taamaammat Inatsisartunut ilaasortaq Atassummeersoq, Kristian Jerimiassen, Qeqertarsuup Tunuani angalatitseqatigiiffimut namminersortumut, Disko Line-imut allagaqarpoq, illoqarfiit nunaqarfiillu akulikinnerusumik aqqusaarneqartarnissaat kissaatigalugu. Kristian Jeremiassen allappoq, angalanermi ulloq ataaseq unnuisariaqaraanni minnerpaamik 1.500 koruunit angalanerup saniatigut aningaasartuutigineqartartut.

Allattoq Jens Thorin

septembarip 13-at 2007 15:20

Ikamiuneersoq Martha Johansen oqaluttuarpoq, Nuummi pikkorissareerluni Ikamiunut angerlarnermini Aasiannut junip 18-ani tikissimalluni. Aasianniillu Ikamiuliarnissaminut aatsaat junip 25-ani billetseqarluni. Taamaalillunilu angallanikkut aaqqissuussineq pissutigalugu, Aasianni sapaatit akunneranni utaqqisussanngorluni.

- Kisianni qujanartumik ulloq taanna iluatsitsivunga, Ikamiormiorlu umiatsialik naapillugu ikiffigaara, taamaalillungalu sapaatit akunnerat Aasianniinnissara pinngitsoortillugu. Sinersortaat Ikamiuliartussaq inortulaarsimannguatsiarakku, Marha johansen oqaluttuarpoq.

Disko Line A/S, namminersortoq Ilulissanilu angerlarsimaffeqartoq, Qeqertarsuup Tunuani angallassinissaq pillugu Namminersornerullutik Oqartussanut kiffartuussinissaq pillugu isumaqatigiissuteqarpoq. Tasani pisortaq, Ole Dorph oqarpoq, aasaruttornerani ataasinngornikkut umiarsuaatimik Aviaq Ittuup Aasianniit Qasigiannguanut ingerlaarnermini Ikamiut aqqusaartarai.

- Tassa taanna uagut isumarput naapertorlugu naammappoq, aamma angalasut, nassataat allakkallu tungavigissagaanni. Isumaqatigiissut naapertorlugu massakkut sulivugut, aamma siunissami taamaaliornissarput eqqarsaatigaarput, Ole Dorph oqarpoq.

Aasiannit Ikamiunut ulluni arfineq marlunni

Aamma atuaruk