Aasianni saqqummersitsineq nalliuttorsiornerlu
Saqqummersitat Aasiannut tunngatitapput, ilaatigut Aasiaat qangaanerusoq, illu issumik ujaqqanillu qarmalik, aasamilu Tupilammi tupersimaartut takuneqarsinnaallutik. Taakku saniatigut Aasiat ukiuni nutaanerusuni, 70-ikkunni inuusuttuuneq nipilersortartullu, kiisalu Aasiaat ilinniartoqarfiunerat takutinniarneqarluni.
”Meeraaninni Qullissat matummata Aasiannut nuuppugut, taamaammallu meeraanerma ilaa inuusuttuaraaneralu tamaat ilinniariarnissama tungaanut Aasiammiuullunga. Aasianni inuunerma ilaa ilusilersugaavoq, nuannersumik inuunermalu sinnera nukittorsaataaqisumik. Aasiannut Aasiammiunullu qujassutissaqaqigama taama suliaqarpunga.” Malînánguaq Marcussen-Mølgaard oqarpoq.
Malînánguaq Aasivik 84-imi saqqummersitsinermi kingorna, aatsaat siullermeersumik Nuup avataani qalipakkaminik saqqummersitsivoq. Taakku saniatigut ilaatigut Katuami, Nuuk Kunstmuseum-imi, Grønlandsbankimi, Nuuk Rådhusiani saqqummersitsinikuuvoq, siornalu Juullimut Nipitittagaliortutut toqqagaalluni, kiisalu Nuummi Ilinniarnertuunngorniat atuarfittaavat qalipakkaminik pinnersarlugu. Aasiaat Katersugaasiviani saqqummersitat 1.sept-ip tungaanut takuniarneqarsinnaapput.
