Aasianni radioqarfik 60-iliivoq
Ullormut marloriarluni - tuluit nalunaaqutaat malillugu - nalunaaqutaq ullup qeqqata siorna aqqanermut, aamma unnukkut nalunaaqutaq aqqanermut - Aasianniit ballonimik aallartitsisoqartarpoq, silarsuarmi tamarmi uuttortaanerit allat 600-t missaanniittut assigalugit. Balloni qullarsinnaaqqullugu brintimik immerneqartarpoq, ataanilu nivingasarput silasiornermut atortut, anori, kiassuseq imaluunniit ississuseq silaannaallu naqitsinera pillugit taakku paasissutissiisarput. Balloni 35 kilometerit missiliorlugit qutsitsigisumut tingisarpoq, qullariartorneranilu silaannaap naqitsinera apparluinnaraangat qaartarluni.
Uuttortaanerit timmisartortitseqatigiinnit atorneqartarput. Aasianniit nalunaarutit atorneqarpata Atlantiku qulaallugu timmisartuussinermi nalunaaquttap akunnera ataaseq sipaarneqarsinnaavoq. Naalagaaffiit Peqatigiinni suleqatigiiffiup ICAO-mik taaguutillip paasissutissat katersortarpai, aningaasartuutaasullu tassani agguataarneqartarput, taamaalillunilu Kalaallit Nunaanni stationeqarfiit tallimaasut siammaseqisullu ingerlanneqarnerat aningaasartuutitaalu annertuut Kalaallit Nunaata Danmarkillu kisimiillutik aningaasartuutigisarnagit.
- Ukiut 60-inngorlugit nalliuttorsiornerput annikitsumik malunnartissavarput, radioqarfimmi pisortaq, Carl Johan Colberg, oqarpoq, suliassavulli kinguninngua ingerlateqqittussaavavut, oqarpoq.