Aasianni persuttaasoqaqqippoq
- Oqaluttuassaqarpallaanngilagut, oqarluttuarisinnaavarpulli angut inuusuttoq kingullermik unnuami marluk missaani illoqarfimmeereerluni angerlarunartoq takuneqarsimammat. Angut kingorna persuttarneqarsimalluni aqqusernup ungasinngisaani nassaarineqarsimasoq kalerriutigineqarpoq. Susoqarsimanersoq pillugu angut nammineq oqaluttuarsinnaasimanngilaq, aalakoorpallaarnini pissutigalugu susoqarsimaneranik eqqaamasaqannginnami, Aasianni politeeq Karl Christian Kajussen oqaluttuarpoq.
Aasianni sapaatip-akunnerata siuliani taamatorluinnaq aamma pisoqarpoq, taamani angut qallunaaq 26-nik ukiulik ilisimanngitsoq, kiinnamigut niaqqumigullu sakkortuumik aamma persuttagaasimasoq, aqqusernup sinaani siumorneqarmat. Angut napparsimmavimmut taamani unitsinneqarpoq perulummalli Dronning Ingridip Napparsimmavissuanut aallarunneqartariaqarsimalluni.
Angutit marluk persuttarneqarsimanerinut atatillugu Aasianni politiit suli tigusarinninngillat, ullumilu apersuisaqattaarnerigalui aamma kinguneqarnatik. Taamaattumik kikkulluunniit Aasianni persuttaasimanernut tunngatillugu ilisimannissimasinnaasut Aasianni politiinut saaffiginneqquneqarput, oqarasuaatip normua 89 42 22-iuvoq.
