Aasianni Oqaluffimmi immikkorluinnaq ittumik ullumi pisoqarpoq
Nukappiarannguaq kuisippoq, nukappiarannguullu saniatigut peqataapput arnaa angutaalu, aanaava aataavalu, aanaqqiia aataqqiialu taavalu aanaqqiuteqqiutaa, 89-inik ukiulik.
Allattoq Carla Davidsen
juulip 15-at 2013 10:59
Tassa kinguaariit tallimarsuit nukappiarannguaq kuisimmat najuupput, tamannalu qaqutigoorluinnartuuvoq, kuisittullu arnaa soorunalimi tulluusimaaqili.
Arnaa tassaavoq Aviaq Reimer, januaarillu ulluisa aqqarnganni ukioq-manna ernertaarpoq, Aasianni GU-mi 3.G-mi suli atuarluni.
Naak naartunermi nalaani atuanngitsuukulagaluarluni, ernertaarnermilu kingorna anaanatut suliassarpassuaqaraluarluni Aviaq Reimer aasaq ilinniarnertuutut soraarummeerpoq. Aasiannilu ukioq-manna GU-rtunit tamanit angusarissaarnerpaalluni.
Oqarsinnaagunarpugullu nukappiarannguaq, Malik Tino Reimer Olsenimik kuissuteqalersoq, ernumananngilluinnartoq.
Kinguaariippassuillu aasiammiuaqqamut tassunga nakkutiginnilluarnissaat qularnanngilaq.
