Aasianni kollegiaqarniarneq suli ilungersunarpoq
Aasianni ilinniarnertuunngorniarfimmi ilinniartunut kollegianik inissaqartitsiniarneq ilungersunarpoq. Ilinniartullu inissaqarniassammata INI a/s-imiit illoqarfimmilu illunik piginnittunit 36-nik attartortoqarpoq.
- Kollegiaqarniarneq ilungersunarpoq, INI-miilli aamma illunik attartortitsisartunit attartortitserusuttoqarneratigut ilinniartussanut tamanut inissaqartitsivugut, Ilinniarnertuunngorniarfimmi rektori Flemming Guntofte Nielsen oqarpoq.
Ilinniarnertuunngorniartussat 383-t sapaatip akunnerata tulliani aallartissapput, taakkunannga 196 kollegiani inissaqarput sinnerilu illoqarfimmi inini attartukkani najugaqartinneqassapput.
Siorna ilinniartut 122-t inini attartukkani najugaqartinneqarput. Ininullu attartukkanut akiliutit katillugit 2,7 millionit koruuniusut naatsorsuutini takuneqarsinnaavoq, taakkualu Namminersorlutik Oqartussanit matussuserneqartarput. Naatsorsuutigineqarporlu ukioq manna aamma aningaasartuutit taama amerlatiginissaat.
Kollegiassaaleqinerli ukiamut annikillissaaq. Tassami kollegiat nutaat 50-nut inissallit novembarimi ilinniarnertuunngornianit iserterfigineqarsinnaalissapput.
- Taamaasillutalu init attartukkavut ikilisinnaassapput, Rektori Flemming Guntofte Nielsen oqarpoq nassuiaallunilu ukiup tulliani aamma kollegiat 50-nut inissallit naammassineqassamaartut.