Aasianni innaallagissiorfiup ajutoornermi pilersuutai nunatsinnut tulluarsagaanngitsut
Innaallagissamik akunnerni arlalinni pilersorneqannginneq, qamittuukulaarnerlu. Aasianni innuttaasut siorna novembarimi decembarimilu qaammatip ataatsip iluani tamakku misigisaqarfigaat.
Innaallagissiorfiummi atortorissaarutaasa ilaannik novembarimi decembarimilu ikuallattoqarpoq. Tamannalu illoqarfiup innaallagiaaruttarneranik kinguneqarpoq.
Innuttaasuniillu tamanna aamma maluginiarneqanngitsoornavianngilaq.
- Soorunami paasinarpoq taamannak qamittooqattaarnerit piffissap ingerlanerani piuartut pisut angisuut marluk siorna ukiup naajartornerani pisut ikuallattooqattaarnerit peqqutaanerupput kingullertigut.
Maannali pilersuineq siumut ingerlalertoq taassuma aamma oqaatigaa.
- Massakkoqqinnaaq pilersuineq ajunngitsumik ingerlavoq, taanna oqarpoq.
Ajutoornermi pilersuutit taarserneqartariaqartut
Aasianni innaallagissiorfimmi pingaarnermi motoorit pingajuata decembarimi ikuallannera pissutigalugu ajutoornermi pilersuutit illoqarfimmiittut ilaat atorneqartariaqalernerannik kinguneqarpoq.
Naallu pilersuineq maanna ajunngitsumik ingerlalereeraluartoq atortut issillualeraangat qamittarnerat pissutigalugu innaallagiamik pilersuinermut aamma eqquisarput.
- Sillimmatigut europami atugassiatut sanaajummata issilerluaraangat qamittoornerit pilersarput taama nillertigisumut atortussatut naleqqussagaannginnerat pissutigalugu, Ovenguaq Lyberth oqarpoq nangillunilu:
- Taamaammat illoqarfimmiittut nammineerluta naleqqusaarniarnikuuagut silap pissusaanut tunngatillugu nillusaanikkut assigiinngitsutigut taava taakkua arlaat qamittooraangat taava tassa illoqarfik ilaatigut tamakkertarpoq ilaatigut illoqarfiup ilaannaa qamittarpoq, taanna oqarpoq.
Nutaamik sillimasiortoqarniartoq
Innaallagissiorfimmi decembarimi 2025-mi ikuallattoornerit kingorna nutarterisariaqalernermik kinguneqarpoq, taannali maanna atuleqqinnissamut piareeriartulerpoq.
- Sulisugut pikkorissorsuupput aamma pinngitsoortinniartuarpaat qamittoornissaq massakkoqqinnaaq motoorit marluk ingerlatigisatta saniatigut pingajuat taanna ikuallannikoq taanna massakkut suliarineqarluni piareersarneqarpoq.
- Naatsorsuutigivarpullu maajimi tikittoqarumaartoq Danmarkiminngaanniit ikkussuiartortunik taava kingusinnerpaamik juulip missaani atuutilersinnaassasut, taanna oqarpoq.
Innaallagissiorfik pingaarneq atorsinnaajunnaaraangat sillimmateqarnissaq pisariaqartarpoq, Aasiannili innaallagissiorfik sillimmatigineqartoq maanna pisoqaavallaarlunilu atorsinnaajunnaareerpoq.
- Una sillimmatigisarput elværki pisoqaq taanna nutaanngitsorujussuuvoq illutaa 1849-minngaanneerpoq ukua motooritai 1970-ikkut missaanneerlutik taava kingoraartissanik pissarsiniarneq ajornakusuulernikuuvoq taamaalilluni aamma taakkua atorsinnaajunnaavinnikuupput, taanna oqarpoq nangillunilu:
- Taamaammat Aasianni aasaq manna sillimmammik maani sanaartortoqassaaq taannalu naatsorsuutigivarput ukiap ingerlanerani piariissasoq taamaalilluta pilersuinerup aalaakkaanerusumik ingerlanissaa anguniarlugu, Ovenguaq Lyberth oqarpoq.
