Aasianni hashi 1.5 kiilu arsaarinnissutigineqarpoq
Aasianni politiit ikiaroornartoq hashi kiilup aappaa avillugu oqimaassusilik anngiortumik eqquteriarneqaraluartoq sapaatip-akunnerisa marluk ingerlaneranni arsaarinnissutigaat.
Allattoq Louise M. Kleemann
oktobarip 27-at 2008 12:17
Anngiortumik eqqusseriaraluartut angutit pingasut kingulliit Aasianni politiinut nalunaarutigineqarput, Kangerlussuarmi politiit qimmiata ikiaroornartumik naamanissamut immikkut sungiusakkap timmisartorsuarmi angutit issiavigisimasaat qimattaalimmagit.
- Ikiaroornartoq haship annersaa iillugu eqquteriarneqaraluarpoq, taama oqarpoq Aasianni Politiit ittuat Gert Jakobsen nangipporlu: uloriasujueqaat, ikiaroornartummi haship iineqartup puua alissimagaluarpat angutit napparujussuarsimasussaagaluarput.
Gert Jakobsen oqarpoq angutit eqqusseriartut iluatsitsisimasuugunik ikiaroornartoq millionip aappaa avillugu iluanaarutigisimassagaluaraat. Angutit pineqartut pingasut politiinit iperarneqareerput eqqartuussivilersuunneqarnissartilli utaqqillugu.
