Aasianni GU-imi ilinniartut Alaska-mut
Aasianni Avannaani Ilinniarnertuunngorniarfimmeersut, ukiup aappassaa ilinniartuusut aqqanillit aqagu Alaskaliarlutik aallassapput. Taakkua ulluni 14-ini Alaskamiissapput naggueqativut ilinniarnertuunngorniat Anchorage-mi ilinniartuusut tikeraassallugit. Air Greenlandip nunatsinniit Baltimoremut attaveqalerneratigut ilinniartut naggueqatitsinnik kititsinniittunik attaveqarusunnerat piviusunngorsinnaalerpoq.
- Alaskami inuusuttut naggueqatitta inuunerat kulturiallu qangali paasisaqarfigerusuttaratsigu immaqalu attaveqarfigilersinnaaniassagatsigik immaqalu Aasiannut tikeraarsinnaaniassammata, taama oqaluttuarput Ivaaq Christensen aamma Nuka Lyberth, sisamanngorpat Alaskaliarlutik aallartussanut ilaasut. Angalasussat marloriaammik amerlassuseqarusukkaluarput, kisianni aningaasaateqarfinnit tapiissutigineqartut ilinniartut aqqanillit kisimik angalanissaannut naammapput. Taamaattumik angalaqataasussat makitsinikkut aalajangerneqarput.
- Siumut utimullu bilitsi 15.000 koruuneqarpoq, Danmarkikkoortussaagaluarutta marloriaammik akiliisimassagaluarpugut, taamaattumik Baltimoremut angalasinnaanerup ammarnissaa utaqqivarput, Michael Hollrup, ilinniartitsisut angalaqataasussat ilaat taama oqaluttuarpoq.
Angalanissamut tapiisut tassaapput NAPA, Nunanut allanut allaffeqarfik, Nuna Fonden aamma ICC. Aasianni ilinniarnertuunngorniarfik nerisanut ullormusiaqartitsinermullu tapiisimavoq.
