Royal Greenland-ip Aasianni raajaleriffiata aappaagu ammarneqarnissaa sulliffisaqartitsilernissaalu nuannaarutigineqaraluaqisoq, taamaattoq aalisartunut tunitsivissaarunnermik kinguneqartussanngorpoq.
Aalisakkannik suliffissuarmi assagiarsulerillutik sulisut 30-t missaanniittut juulip ulluisa 28-anni soraarsinneqartussaasut, ippassaani nalunaarfigineqarput, Inatsisartuni partii Inuit Ataqatigiit sinnerlugit ilaasortaq Ane Hansen tusagassiuutinut allappoq. Raajaleriffik aappagu ammarneqarpat, assagiarsunniat 30-nit 40-nut amerlassusillit Aasiannut tunisisinnaajunaassapput, Qeqertarsuarmullu tunisisalerunik, ullumikkut saattuat akii eqqarsaatigissagaanni, assagiarsunnianut akilersinnaangitsoq, Ane Hansen allappoq, nangillunilu saarulliit utersaarneranni, saarullinniat aalisaleruttortut Aasianni tunitsivissaarutissapput. Ilanngullugulu periarfissaanerarpaa, Aasianni arlariinnik tunisassiorfeqarsinnaaneq tassalu raajanik saattuanik aalisakkanillu tunisassiorsinnaaneq.
Raajaleriffik ammarneqarpat, Aasianni imminermi raajarnianik kilisaatersortoqanngilaq, tamannalu ajornartorsiutaavoq, Ane Hansen allappoq.
Royal Greenland-ip suliffissuani Aasianniittumi sulisut soraarsinneqartut, ukiup affaa suliffissaaleqisuunissaanni suliassaqartinniarlugit iliuseqarfigineqartariaqartut Inuit Ataqatigiinniit piumasarineqartoq Ane Hansen allappoq.
