Aasianni ajorluinnartumik pisoqangajappoq ajunngitsumilli inerneqarpoq
Aasianni politiit ulluinnarni aqutsisuat Aqqaluk Petersen Radioaviisimut taama oqaluttuarpoq.
Politiit angutip angerlarsimaffianut apuukkamik igalaavatigut ilummut alakkarternerminni takusinnaasimavaat angut taanna seeqqummeqqalluni qoorortumik imminut ummiuteqqasoq.
Taamaammat ajornerusumik pisoqannginnerani politiit tunuarterasuarput, angullu inoqatiminut kamaammiussilernissaa ernumagineqarmat inigisaata eqqaa tamarmi politiinit assersorneqarluni.
Politiit qullersaqarfiat Nuummiittoq Aasianni politiinut isumasiorneqareermat Ilulissani Sisimiunilu politiit Aasiannukartinneqarput.
Politiit Ilulissaniittut qulimiguulimmut ilaallutik Aasiannut apuupput, qulimiguulillu Sisimiut politiivineersunik aallerluni ingerlaannaq aallaqqissimalluni.
Politiit Sisimiuneersut Aasiannut apuutinngitsiarneranni pisoq tujorminartoq nuannaajallannartumik naggaserneqarpoq.
Nalunaaqutaq aqqaneq qaangilaaraa angut sakkulisaarani nammineerluni anillappoq politiinullu tunniutiinnarmat Aasianni aqqusinernik politiit assersuinerat taamaatinneqarpoq.
- Angut taanna inatsisinik unioqqutitsisimanngimmat Aasianni politiinit oqaloqatigineqarpoq tamatumalu saniatigut imminut toqukkusunnini pillugu nakorsamik oqaloqateqarluni, Aqqaluk Petersen, Aasianni politiit ulluinnarni aqutsisuat taama oqaluttuarpoq imalu nangilluni:
- Taama quarsaartitsisimanini kanngusuutigerpaseqaa, ullaalli tungaani iliuuserisimasani aalakoorsimangaarmat eqqaamasimanngilai, Aqqaluk Petersen, ajornerusumik pisoqarsimannginneranik qujamasuppaseqisoq taama oqaluttuarpoq.