Aasianni aallaasersortoqarpoq

Aasianni politiit sapaatip akunnerata naanerani ulapingaatsiarput. Kangaatsiami angerlarsimaffimmi eqqissiviilliornerit saniatigut, arfininngornerup unnuaani angutit marluk aalakooqisut illup iluaniik silammut aallaasersorlutik eqqartut tigusarineqarput.
oktobarip 20-at 2008 10:16

Kangaatsiami angerlarsimaffinni tallimanngornermat eqqissiviilliorneqangaatsiarsimavoq, ilaatigut kommunefoged angerlarsimaffinnut eqqissisisaajartortariaqartarsimasoq, Aasianni politeeqarfiup pisortaata Gert Jakobsen oqaluttuarpoq.

Taakkua saniatigut Aasianni arfininngormat unnuap qeqqata missaani aallaasersortoqarnerarlugu kalerriisoqarmat politiitt ornigupput. Angutit marluk 30-t 40-llu akornanni ukiullit aalakuungaatsiartut illup iluaniit silammut timmiarsiummik eqqartut paasineqarput. Angutit timmiarsiummik 230-riarlutik silammut eqqarsimapput taakkulu tigusarineqarput. Angutit taakku iperagaareerput, politiillu maleruaqqusaat malillugu sakkunik atuinermi unioqqutitsisimasutut, inunnillu ulorianartorsiortitsisinaasutut eqqartuunneqartussanngorlugit unnerluutigineqarput. Aamma sapaatiummat ullaakkut nal. Arfineq marlunut qiteqqutilersoq illu ikuallaleraluartoq qaminneqarpoq, ikuallanneq oliefyrimiit aallartissimasutut oqaatigineqarpoq, sulili misissuineq ingerlanneqartut Aasianni politeeqarfiup pisortaa Gert Jakobsen oqaluttuarpoq

Sapaatip akunnerisa kingulliit marluk ingerlanerani sinerissami politeeqarfiit ataasiakkaannguanik angerlarsimaffinni eqqissiviilliornernik eqqissisaajartornerit eqqaassanngikkaanni immikkut taasarialinnik ulapputeqartoqarsimanngilaq.

Nuummi politeeqarfimmiit ullo´qeqqata tungaanut pisimasunik oqaaseqartitsisinnaasimanngilagut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq