Aasiammiut: Tusagaq tupaallannarpoq ajuusaarnarlunilu
Kommunalbestyrelsemut ilaasortaq Inuit Ataqatigiinneersoq Peter Olsen ima oqarpoq:
- Qanoq iliuuseqarnissara maanna pisariaqalerpoq, suleqatigiilluta atorfilittanut attaveqartariaqarpugut, tusagaq tupannarpallaaqaaq.
Aamma Siumut Aasiaat tamassumunnga isumaqataavoq - eqqagassat ulorianartut qanoq iliornikkut aaqqiivigineqarsinnaanerannut sulisoqarsimannginnera ajuusaarnarpoq, Leo Rosing kommunalbestyrelsemut ilaasortaagallartoq oqarpoq, nangipporlu:
- Eqqagassat taama annertutigisut maanngaattalernissaat tusarnikuunagu tamanna eqqarsariarnartoqarpoq. Minnerunngitsumik eqqakkat ulorianartut peqqissaarunneqarlutik inissinneqarnissaat pigaaruteqarpoq, minnerunngitsumik inuit ulorianartorsiortinneqannginnissaat eqqarsaatigalugu.
Leo Rosingip aamma oqaatigaa eqqakkat ulorianartut Aasianniisinnagit allamukaanneqartariaqaraluartut.
Qaasuitsup Kommuneata Avatangiisit pillugit qullersaqarfiata pisortaa, Jan Erik Andersen radioaviisimit attavigineqareernermi kingorna, eqqakkat tonsikkaat qanoq ilornikkut aaqqiivigineqarsinnaaneri paasiniarlugit suliaq aallartissimallugu oqarpoq.
