Aasiammiut naluttarfittaarusupput

Aasianni inuttaasut ippassaq unnukkut katersortarfimmi ataatsimiisinneqarneranni inuit orniguttut siunissami illoqarfiup qanoq isikkoqarsinnaanera oqaluuseraat. Kissaatigineqartut ilagaat naluttarfik.
Allattoq Salome Hansen
septembarip 27-at 2011 11:50

- Isummat oqaluuserisasi ukiaru Qaasuitsup kommuneani kommunalbestyrelse ataatsimiinnerani ingerlateqqinneqarumaarput, Hans Peter Barlach Christensen Qaasuitsup kommuneani Aatsitassarsiornermi suliani ataqatigiissaarisoq, inunnut orniguttunut tikilluaqqusinermini ilaatigut taama oqarpoq.

InuitAasiaat katersortarfianni ornigussimasut 20-t missaat eqimattanngorlik siunissami Aasiaat illoqarfiata qanoq iluseqarsinnaaneranik eqqartuisinneqareerlutik saqqummiussipput.

Eqimattat sisamat saqqummiussereersullu  erserpoq eqimattat tamarmik  illoqarfiup naluttarfittaarnisaa kissaatigigaat.

Naluttarfillu ikuallaaviup ungasinngisaani ikuallaavimmit kiassarneqarluni inissisimassasoq kissaatigineqarpoq.  Taakku saniatigut kulturikkut illorsuartaarnissaq, talittarfiullu allineqarnissaa kissaatigineqartut annerit ilagaat.

Illut aserfallassimasut  atorsinnaajunnaarsimasullu piiarneqarnissaat, kiisalu  meeqqat pitsaanerusunik ornittagaqalernissaat kissaatigineqartunut aamma ilaapput.

- Torrak taama unnussiuaartitsisusi, tassa katersortarfik taama atorneqartussaavoq - Qujanaq, arnaq utoqqasaaq ataatsimiinnerup naanerani Hans Peter Barlach Christensenimut ornigulluni assammillugu aniartulinnginnermini qujavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq