Aasiaat Taekwon-Do-mik pissartanngorniuffiussapput

Unammisartut nukarliit aqagu sisamanngornermi Pilersuisoq Cup-imi unammisaqattaarlutik aallartissapput. Tamatuma kingorna inuusuttuaqqat, inersimasut misilittagartuullu sapaatit akunnerata naanerani nunatsinni pissartanngorniullutik unammisaqattaalissapput, unammisaqattaarnerillu sapaammi oktobarip ulluisa 31-ani naammassissallutik.

Nunanut allanut unammisartut sungiusaasuat Lauritz Heilmann nunatsinni pissartanngorniulluni unammisaqattaarnerni 2011-mi nunarput sinnerlugu nunanut allanut unammisartussanik toqqaasussani siuttuusussaavoq.

Nunanut allanut unammisartut Estlandimi februaarimi Europami pissartanngorniunnissanut aamma Koreami septembarimi nunarsuaq tamakkerlugu pissartanngorniunnissanut peqataanissaat GTF-imi pilersaarusiorneqarpoq.

- Saqqarmiunnanniarutta tutsuiginartorujussuarmik piareersartariaqarpugut. Nunatsinni nunani tamalaani pitsaanerpaanut ilaatilluta unammisaqattaarnerit sakkortoorujussuussapput, Lauritz Heilmann oqarpoq.

Nunatsinni pissartanngorniunnerit ilaatigut Nunani tamalaani Taekwon-do-tartut præsidentiannit (IFT), professor Chang Ungimit isiginnaarneqassapput.

IFT-imi præsidenti aappassaannik nunatsinnut tikeraarpoq. Chang Ung Nunani tamalaani Olympisk Komite-mi aamma ilaasortaavoq taassumallu ilaatigut Kalaallit Nunaanni Timersoqatigiiffiit Kattuaffinni ilaasortanik ataatsimeeqateqassalluni.

- ITF-ip præsidentiata nunatsinnut tikeraarnissaa tulluusimaarutigisorujussuuarput ataqqinarsaatigisorujussuullutigulu. Tamanna nunatsinni Taekwon-do-tartut nunani tamalaani ataqqineqarnerannut takussutissaavoq, Kalaallit Nunaanni Taekwon-do-tartut Kattuffianni siulittaaoq Kim Rosing oqarpoq.

Qaqortumi, Narsarmi, Nuummi, Maniitsumi, Sisimiuni aamma Aasianni klubbit ukioq manna nunatsinni pissartanngorniunnernut peqataatitaqassapput.