Aasiaat borgmesteria kingulleq Kommune Qeqertalimmit nersornaaserneqartoq
Tamanna pivoq kommunalbestyrelsip ukioq manna ataatsimiinnerani kingullermi. Tassani borgmester Ane Hansenip (IA) kommuunip nersornaasiuttagaanik nutaamik Enok Sandgreen (S) saqqarmiulerpaa. Taama Kommune Qeqertalik nittartakkamini allappoq.
Enok Sandgreen, Aasianni kingullersaalluni borgmesteriusoq, Kommune Qeqertallip nersornaasiuttagaanik, Nersornaammik, nersornaaserneqarpoq.
Tamanna pivoq kommunalbestyrelsip ukioq manna ataatsimiinnerani kingullermi. Tassani borgmester Ane Hansenip (IA) kommunip nersornaasiuttagaanik nutaamik Enok Sandgreen (S) saqqarmiulerpaa. Taama Kommune Qeqertalik nittartakkamini allappoq.
Enok Sandgreen, Aasiaat Kommuniat Qaasuitsup Kommunerisimasaanut kommunit allat arfineq-marluk peqatigalugit kattummat borgmesteritut Aasiaat Kommunianut, atorunnaarsitsisuuvoq.
Kommune naapertorlugu Enok Sandgreen qinikkatut ukiuni 30-ani atuussimanerminut nersornaaserneqarpoq.
Enok Sandgreen kommunalbestyrelsimut aamma bygderådinut Akunnaamit 1989-imi qinigaaqqaarpoq partii Inuit Ataqatigiit tunuliaqutaralugit. Tamatuma kingorna bygderådimi ukiut 16-it siulittaasuuvoq, taassumalu saniatigut kommunalbestyrelsimi ilaasortatut atuuffeqarpoq.
AAMMA ATUARUK Kommune Nersornaammik saqqarmiuliisalernialertoq
- Enok Sandgreenip suleqataaffigisaani siulliuvoq 1990-ip aallartilaarnerani pisoq. Tassalu bygderådet akisussaaffeqanngitsut atorunnaarsillugit Nunaqarfimmi Aqutsisutut taaguuteqalissasut. Tamannalu Nunaqarfimmiut Naalakkersuisullu ataatsimeersuarneranni Ilulissani pisumi akuersissutigineqarpoq, Kommune Qeqertalik taama allaaserisaqarpoq.
Enok Sandgreen 2005-imi kommunalbestyrelsimut qinersisoqareersimatsiartoq Inuit Ataqatigiinnit anivoq, taamaalillunilu Aasiaat Kommuniani Atassut aamma Siumut suleqatigalugit borgmesterinngorluni.
- Tassani suliassaq annertooq unamminartorlu suleqataaffigisimavaa, taamani Aasiaat nunatsinni suliffissaaleqiffiusunut ilaavoq. Taamani kimmuunimi sulisut ataasiarlutik kingusinaarlutik akissarsipput aningaasaqarneq kommunimi ajoruttormat, Kommune Qeqertalimmit taama allapput.
Kommune Qeqertalik ilanngullugu allaaserisaqarpoq Enok Sandgreen Aasianni suliffissanik pilersitsiniarluni ilungersuuteqarsimasoq, tamatumalu kingorna aalisakkanik suliffissuaq ammarneqarsimavoq, soorlu aamma Pilersuisoq illoqarfimmi pisiniarfimmik ammaasimasoq.
Taakku annerusut Enok Sandgreenip Aasianni borgmesteriunermi nalaani suliffiit allamut nuunneqartussaagaluit Aasianni uninngatinnissaat suleqataaffigai, Kommune Qeqertalik taama allappoq.
Enok Sandgreen aamma kommunit kattuffigilersimasaanni Kanukokam siulittaasuunikuuvoq.
