Aasaanerani qaamaneq imminut toqukkusulersitsisarpoq

Inuppassuit isumaqartaraluarput inuit ukiup taarnera nikallussutigalugu imminnut toqukkusulernerusartut, killormorluinnarli ittoq misissuinerup ersersippaa, tassa inuit aasap qaamanera nikallussutigalugu imminnut toquttartut.

Sverigemi Stockholmimi napparsimmavissuarmi, Karolinska Institutimi, ilisimatusartut eqimattat ukiuni 34-ni, tassa 1968-imiit ukioq 2002-p tungaanut, Kalaallit Nunaanni imminut toquttarnerit tamaasa misissuiffigisimavaat.

Ilisimatusartut pisortaat tassaavoq Karin Sparring Björksten. Aasaanerani imminut toquttoqartarnera taassuma qaffasinnerarpaa, juunimilugooq, seqinnerfiunerpaasartumi, amerlanerpaasarlutik.

Imminut toquttartut Kalaallit Nunaata Avannaani amerlanerpaapput. Aasaanerani imminnut toquttut 82 procentii Avannaani pipput.

Norgemi Finlandimilu imminnut toquttartut aasaanerani aamma amerlanerusarsimapput.

Imigassaq aalakoornartortalik imminut toquttarnernut pissutaanngilarooq. Kalaallit aalakoornartortalimmik imigassartortarnerat ukioq naallugu taamaaginnartarpoq.

Aasaanerani qaamagaangat sinimmik amigaateqarsinnaaneq imminut toqukkusulernermut pissutaalluarsinnaavoq.

- Tarnikkut nappaarsimaqqajaasuugaanni, sinnakinneq iluamilluunniit sininngitsoortarneq imminut toqukkusulernermik kinguneqarsinnaavoq, Karin Sparring Björksten aviisimit Svenska Dagbladimit apersorneqartilluni oqarpoq.