Aarrit nungutaanissaminnut ulorianartorsiortinneqartut

Appat kisimik nunatsinni nungutaaqqajaanngillat. Aarrit aamma nungutaanissaminnut ulorianartorsiortinneqartut, Pinngortitaleriffik nalunaarpoq.
Allattoq Jette Andersen
novembarip 03-at 2013 12:58

Issittumi Siunnersuisoqatigiit issittumi uumassusillit suleqatigiinnut misissuiffigitissimavaat, inernerisalu Pinngortitaleriffimmiutut aamma takutippaat aarrit nungutaanissaminnut uloriarnartorsiortut.

Politikerit peqatigiiffiillu aarrit pisassat amerlineqaqquvaat. Naak Nunatsinni nungutaanissaminnut ulorianartorsiortinneqaraluartut.

Neqaat avannaani qimminut nerukkaatasussatut KNAPK, Partii Inuit Atassutip siulittaasua Inatsisartunullu ilaasortat arlaqartut tusagassiuutinut allagaqarput.

Aamma paragraf 37 atorlugu Kristian Jeremiassen apeqquteqarpoq avannaani aaffattassat amerlineqarsinnaanersut. Apeqquteqaammi aamma erserpoq neqaat qimmit nerisassaattut eqqarsaataasut.

Aalisarnermut, piniarnermut nunalerinermullu naalakkersuisoq Karl Lyberth junimi tusagassiortunik katersortitseqqaarami Qaanaami piniartut neriorsorpai siunissami killilersungaanngittumik aaffanniarsinnaalissasut.

Peqqutaatinnerarpaa piniagassarpassuaqartoq, piniartullu ikittunnguusut.

Ukiut arfinillit Hans Meltoftep, Aarhusip Ilisimatusarfianeersup, Issittumilu Siunnersuisoqatigiit suleqatigiissitaaneersup misissuinermut aqutsisup inerniliussimavaa, maanna taamaallaat tunumi nunami eqqissisitami aarrit neriniarlutik uninngaartarfeqartut.

- Ilisimavarput qangaanerusoq aarrit uninngaartarfii 14-iusimasut, aarrit aamma aasaanerani mamaartarfigisaat. Maannali ataaserluunniit sinnerutinngilaq, eqqaanneqarlutik imaluunniit akorngusersorneqarlutik qimaatinneqarsimapput.

Uninngaartarfiit aaarrinut pingaaruteqaqaat, nerisaqarniarneq pillugu, Hans Meltofte nassuiaavoq. Oqarsinnaanngilarli uninngaartarfiit ikilinerisa allamut nuutsissimaneraat imaluunniit nungutaaqqajaanersut.

Ilisimaqqissaanngilara. Kalaallit Nunaanni Pinngortitaleriffimmi tamakku ilisimaneruaat. Nunarsuarmioqataasutulli Hans Meltoftep Kalaallit Nunaanni pissutsit Svalbardimut assersuussinnaavai.

- Ukiut 30-it matuma siorna Svalbardimeeqqaarama, ataasinnguamilluunniit uninngaartarfeqanngilaq. Tamarmik nungutaasimapput. Maannali ukiut 30-it qaangiuttullu aarrit 3000-iupput, Svalbardimi uninngaartarfinni 20-30niittut. Tamanna ajornanngilaq.

Issittumiittunut nunanut naleqqiulluta uumasut pillugit kinguaqqavugut, Hans Meltofte oqarpoq.

Ulorianartorsiorfimmiippugut, allaat nuannarineqanngittunik aalajangertariaqartarluta, uumasut nunguinnarneqassanngippata amerliartortillugilli, appaappata, aaviuppata allaappataluunniit.

Piniartut takornariallu eqqarsaatigalugit, Kalaallit Nunaata aarrit amerliartoqqinnissaat sulissutigisariaqaraa proffesori misilittagartooq Hans Meltofte oqarpoq.