Aarluk sungiusaasumik ipititsisimanersoq oqallisaavoq
Maanna paasineqarpoq aarluk, Tilikum, sungiusarneqartanngikkallarami qaasuttorujussuusimasoq. Aarluup taassuma British Columbiami aliikkusiartarfissuarmi sungiusaasumi ilaat 1991-imi ipitissimagaa maanna oqallisaalerpoq.
Angutip mattaangasup timaa toqungasoq aarluup taassuma qatigaani 1999-imi ullaat ilaanni aamma nassaarineqarsimavoq. Oqartussaasut taamanikkut eqqoriarpaat angut imermi 13 gradiinnarnik kissassusilimmiitilluni nillortoorluni ipisimasassoq. Aviisimi Orlando Sentinelimi tamanna allaaserineqarpoq.
Uumasunik sungiusaasartoq 40-nik ukiulik, ippassaq ajunaartoq, uumasunik sungiusaanermik ukiuni 16-ini misilittagaqarpoq, SeaWorldimilu pisortap, Dan Brownip, oqarnera naapertorlugu, uumasunik sungiusaasartunut pikkorinnerpaanut ilaagaluarpoq. Ajunaarneq pissutigalugu SeaWorldimi takutitsinissat tamarmik ullumikkut taamaatiinnarneqarput.
