Aarluk filmimi "Befri Willy"-miittoq aniguivissunngilaq

Aarluk Keiko - filmini "Befri Willy"-ni tusaamasarsuanngortoq - aniguivissunngilaq. Ukiorpassuarni uumasuutaareerluni inunnut atassuteqarnerulerpoq aarloqatiminut pinnani.
maajip 07-at 2009 13:34

Taamatut inerniliisoqarpoq ilisimatuussutsikkut allaaserisami "Marine Mammal Science-imi Malene Simonimit Kalaallit Nunaanni najugalimmit allanneqarsimasoq.

Naak aarluk pinngortitamut uterteqqinniarlugu nunarsuatsinni suliniaqatigiiffiit inuinnaallu aningaasarpassuarnik tunissuteqaraluartut taamatut misiliiniarnerigaluaq aallaqqaataaniilli iluatsittussaanngitsutut isikkoqareersoq Malene Simon allappoq. Taamatut oqarnermini suliniaqatigiiffimmit Free Willy-Keiko Foundation-imit 2003-mi pinngortitamut uterteqqiiniarnera pillugu iluatsinnerarneqartoq akerlilerpaa.

Keiko 2006-imi 26-nik ukioqarluni toquvoq, pinngortitamut uterteqqinneqarniarnerigalua iluatsinngimmat Norgemi kangerlumi inunnit taamani nerukkarneqartarlunilu sungiusarneqarpoq. Naak aarluit allat qanillisaraluarlugit aarlunnut ataatsimoortunut ilaalinngisaannarpoq aarlooqataanissaminut piginnaasaqannginnami.

- Norgemi ammasumik ungalukkamiinnera Keikomut pitsaanersaasimavoq, taama Malene Simon inerniliivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq