Aarluit saassussiumatuunngorsimapput

Aarluit Canadap kimmut sineriaani Alaskallumi sineriaani nassaassaasut nerisakippallaarnertik pillugu saassussiumatuunngorsimapput.

Tamaani aarluit eqalunnik annerusumik nerisaqartuupput, eqaluilli pisarnermit ikinnerulersimapput. Aarluit tamanna pillugu allaat Beringip imartaanut ingerlaartalersimapput tamaani nerisassarsiortalersimallutik.

Alaskami aalisariutaatillip Paul Clampittip aviisimut Anchorage Daily Newsimut oqaatigaa aarluit aalisariutit malersortalersimagaat.

- Atortut elektroniskiusut atorlugit nipiliortarpugut, aarluit qimaatinniarasaralugit, aarluilli qimaaneq ajorput, Paul Clampitt Anchorage Daily Newsimut oqarpoq, nangillunilu:

- Qassutit nataarnanik saarullinnillu ulikkaaraangamik qassutit saassuttarpaat, pisaavullu nerisarlugit. Aarluit immaqa marluusinnaapput, amerliartortarpulli pisarisavullu amerlanerit nerisarlugit, Clampitt oqarpoq.

Tamaani aalisartut aarluit qimaatinniarlugit qanoq-iliuusissanik nutaanik maanna ujartuinialerput.