Innaarsuit: - Aarlerineq aanngasinnerulerpoq
Innaarsummiut 33-t iluliarsuup nunaqarfiup saaniittup aseroriasaarsinananera pissutigalugu angerlarsimaffimminnit sapaatip akunnerata siulianili allamut nuutsinneqarallaqqapput. Iluliarsuaq weekendip ingerlanerani 500-600 meterinik avannarparterpoq.
Iluliarsuup allami inissisimalernera pissutigalugu najugaqartut illuminnit qimagutsitaaqqasut angerlaqqissinnaasut politiit sillimaniarnermik nalilersueqqereerlutik paasissutissiissutigaat.
Sissap sinaanit qummut 10 meteri ulorianartorsiorfiusutut maanna nalunaaqutserneqarpoq. Nunaqarfinnilu aqutsisuni ilaasortaq Susanne K. Eliassen naapertorlugu najugaqartut eqqissisimanerulersimapput, Susanne K. Eliassen oqarpoq.
- Aarlerineq aanngasinnerulernikuuvoq, sumik isumanngittorujuupput nunaqqativut. Iluliat portusuut saatsinneeriarlutik taakunga pigaangata ernumaneq annikillisarami. Aarlerisunik imannarsuaq maluginiaqanngilanga.
Iluliarsuaq aserussappat tassaarnissaata navianaateqarnera pissutigalugu najugaqartut 33-t nunaqarfimmi qatsinnerusumut nuutsikkallarneqarsimapput.
Pilersuisoq, aalisakkanik suliffissuaq nukissiorfillu suli matoqqapput, innuttaasullu sissap qanittuani najugaqartut angerlarsimaffimminnut suli utersinnaanngitsut, politiit erseqqissaatigaat.
Nunap assinga ulorianartorsiorfiusutut maanna nalunaaqutserneqaqqasumik takutitsisoq KNR-ip nittartagaani takuneqarsinnaavoq.
Innaarsunni sillimaniarneq pissutigalugu killigititaq maanna ima isikkoqarpoq:
