Aarhusimi saqqummersitsineq soqutigineqarluarpoq

Qaammatit marluk siulliit ingerlaneranni katersugaasivik Den Gamle By-miittoq Frilandsmuseet, aatsaat taamak takuniaasunik isertoqartigaaq. Assiliarsuit plakatit Kalaallit Nunaanni assillisat 250it katersugaasivimmi ulluni makkunani saqqummersinneqarput.
Allattoq Jaaku Lyberth
marsip 09-at 2011 05:06

Katersugaasivimmut isertut siornamut sanilliullugit 22 procentinik amerleriarput, katersugaasiviup tusagassiuutinut nalunaarutaani taamatut allassimavoq.

Katersugaasivimmut isertut taamak amerlatiginerat siornatigut naammattoorneqarsimanngitsoq, katersugaasiviup pisortaata Thomas Blockip oqaatigaa.

Kalaallit Nunaat pillugu saqqummersitsineq februaarip qaammataata qiteqqunnerani ammarneqarpoq aggustillu arfineq-aappaata tungaanut takuniarneqarsinnaalluni.

Meeqqat atuarfiini ukiuunerani atuanngiffeqarnerisa nalaani Kalaallit Nunaannut tunngassuteqartunik katersugaasivimmi Den Gamle By-mi sammisassaqartitsisoqarpoq.

Meeqqat tupilliornissaannik, ajakkanik sananissaannik sapanngaaqqanillu nuisinissaannik periarfissinneqarput, taamatut sammisaqartinneqarnerani, anersaat pillugit kalaallit oqalualaavi tusarnaarneqarsinnaasimapput.

Katsersugaasivimmut ukiormanna isertut 400.000-iunissaat anguniarneqarpoq, siorna isertut 311.000-iusimagamik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq