Aaqqissuusseqqinnermi akissaatikinnerulersut akissaateqarnerulersullu
Akinik assigiissitsinerup aaqqissuussaanerata kinguneri pillugit misissuinermi inernerit, pisortatigoortumik suli saqqummiunneqanngitsut, Radioaviisimiit maanna tusarliussinnaavagut:
Akinik assigiisitsinerup aaqqissuuteqqinneratigut akissarsiakitsut illoqarfinni annerusuni najugaqartut maanna aningaasaqarniarnerat malunnaatilimmik pitsanngoriarsimasoq, inernerit siulliit takutippaat.
- Tassa assersuutigalugu iliniarsimanngitsut marluk marlunnik meerartallit illoqarfinni anginerumaani soorlu Ilulissani, Sisimiuni imaluunniit Nuummi najugaqartut maanna atugarissaarnerulersimapput, tamannalu misissuinitsinni erserpoq, Rasmus Sembach Olsen, Avatagiisinut Aqutsisoqarfimmi Pilersuinermut allaffimmi pisortaq oqarpoq.
Kiisalu nunaqarfinni avinngarusimasunilu innuttaasut akinik assigiissitsinerup nalaani akissaatigissaartut akinik assigiisitsinerup aaqqissuussaaqqinnerata kingunerisaanik akissaatikinnerulersimasut malunnarsivoq.
- Akissaatikinnerusulli eqqorneqangaarnavianngillat, amerlasuummi innaallagissamut imermullu akiligassaat pisortanit akilerneqartarput, Rasmus Sembach Olsen oqarpoq.
Innuttaasut aningaasatigut qanoq akissaateqarnerulersimanersut imaluunniit akissaatikinnerulersimanersut maanna koruuninngorlugu suli kisinneqanngitsoq, Rasmus Sembach Olsen nassuiaavoq.
-Ikummatissap akiata qaffannera suli misissuinitsinnut ilanngutinngilarput, taamaattumik aningaasaqarniarneq qanoq eqqorneqarsimasoq suli oqaatigiuminaappoq, Rasmus Sembach Olsen erseqqissaalluni oqarpoq.
Misissuinermi inernerit inatsisartut ukiamut ataatsimiinnerini aatsaat saqqummiunneqarumaarput, taamanikkussamullu nalunaarut politikerinit oqallinnerni aallaavigineqarumaarpoq.
- Nalunaarut oqallinnissamut aallarniutaavoq, politikerillu nalilersuinermikkut aalajangiiumaarput, Rasmus Sembach Olsen oqarpoq.
Akinik assigiisitsinerup aaqqissuussaaqqinnerata naliliiffigineqarnerani akileraartarnermik aaqqissuusseqqinnerup kinguneri nalunaarummi aamma misissorneqarput.
