Aaqqissuusseqqinneq atorsinnaannginnerarpaa
Kommuneqarfik Sermersuumi meeqqeriviit pisortaqartinnerisa allanngortinniarneqarneranni pisortap ataatsip meeqqeriviit arlallit pisortaaffigilissavai. Allanngortiterinerup kinguneranik aamma perorsaasoq aalajangersimasoq meeqqerivimmi ataatsimiissaaq allalli pisortaasup pisortaaffiini allani pisariaqartinneqaraangamik nooqattartinneqartassapput. Kommunep nalunaarneratut taamaalillutik nukiit atorluarneqarnerussapput.
Nutaamik aaqqissuineq qanorpiaq timitalerneqassanersoq kommunemiit suli ilisimaneqavissunngilaq. Eqqarsaatigineqarporli pisortap ataatsipmeeqqeriviit arlallit pisortaaffigiutigalugit sulisunullu ilaautigaluni aamma perorsaanikkut ineriartortitsineq akisussaaffigissavaa. Kommuneqarfik Sermersuumiit taamatut aaqqissuinerup meeqqanut tunngasut isumannaallisarneqassapput. Taamatulli aaqqissuineq atorsinnaangilaq, ulloq naallugulu paaqqinnittarfinnut Inatsisartut peqqussutaannik unioqqutitsinerusinnaalluni, tassanimi ersarissumik allassimapput paaqqinnittarfinni pisortat suliassaat. Agga Lund Inerisaavimmiit taamatut oqarpoq. Taassuma aaqqissueqqinneq eqqarsaatigilluagaanngitsutut taallugu isornartorsiorpaa:
Meeqqerivinni pisortat arlariinnik pisortaaffeqalernissaat peqqussummut kommunillu pilersaarutaanut imminnut naapertuuppa?
-Naapertuutinngilaq! Taamaammat eqqarsariarnartorujussuuvoq. Arra, qanoq ililluni meeqqerivimmi pisortap taava suliani ingerlatiinnarsinnaavai atatillugit atanilimmillu. Peqqussummi § 17-mi allassimasoq njoqqutaralugu meeqqerivik pisortaqartussaavoq pisortallu taassuma meeqqeriviup perorsaanikkut ingerlanneqarnera aamma
aningaasaqarnikkut nakkutiginissaa suliarisussaammagu. Taavalu uani nalunaarummi nutaarluinnartut isikkulerlugu allannguutissatut taasimanera takujuminaatsorujussuuvoq sukkut allanngortinniarneqarnersoq ingerlatseriaaseq, Agga Lund oqarpoq.
Perorsaasut suliaat ataqqineqarsimanngitsut aamma Agga Lund isumaqarpoq. Inerisaavik paasissutissarpassuarnik peqaraluartoq allanngortiterinermi isumasiorneqarsimanngillat. Perorsaasut aamma suli tusarniarneqarsimanngillat.
Taamaammat allanngortiterinissamut siunnersuut Agga Lundip apeqquserpaa. Paaqqinnittarfiit ingerlanerat allanngortiterneqartariaqaleraluarpoq, pitsanngorsaaniaraannili siunnersuutigineqartoq iluaqutaanavianngitsoq, Agga Lund isumaqarpoq.
Nutarteriniarneq aamma meeqqat ineriartornerannut sunniuteqarnerloriaannaavoq.
BUPL-imi perorsaanikkut siunnersorti, Peter Engelbrekt Petersen isumaqarpoq Kommuneqarfik Sermersuup siunnersuutaa akuerineqassappat tamanna meeqqanut sunniuteqarnerlussasoq. Perorsaasut nikerartualerpata meeqqat toqqissisimajunaassapput, minnerunngitsumik meeqqat aallarteqqaarnerminni mianersuuttariaqartillutik:
Meeqqanut nuannernavianngilaq, meeraqatiminnullu atassuteqarniarnerat killeqasalluni kiisalu ataatsimut suliaqartinniartillutik pissarsiaqarsinnaanerat killeqalissasaq ilisarsiniaqqaartassagamik sissuilertarlutillu.
Taanna isumaqarpoq nutarterineq sunniuteqarnerlussasoq, meeqqammi allanik atassuteqarnermikkut ikinngutitaartortarmata oqaatsimikkullu ineriartortarlutik ajornartorsiut annertusisinnaasoq. Sulisut nikerarnerisigut perorsaaniarneq ilinniartitsiniarnerlu sunnerneqarnerlussapput, soorlu perorsaasut angajoqqaallu akornanni ataqatigiinneq aamma aalajaatsuusariaqartoq, Peter Engelbrekt Petersen oqarpoq.
Angajoqqaat meeqqatik perorsaasunut nalunngisaminnut tunniuttarnissaat pingaaruteqartupilussuuvoq. Perorsaasut aamma angajoqqaanut atassuteqarluarnissaat pingaaruteqartupilussuuvoq, minnerunngitsumik angajoqqaanut ajornartorsiuteqareersunut toqqissisimanartumik attaveqarneq sivisuumik anguniarneqartarmat.
