Aaqqissuisuuneq tunuarpoq

Atuagagdliutit ukioq manna ukiut 150-inngorlugit nalliuttorsiortup aaqqissuisuunini annaasussanngorpaa.

Inga Dora G. Markussenip ukiut marluk sinneqartuni aaqqissuisuunerata nalaani pisorpassuaqarpoq. Soorlu Namminersorlutik Oqartussat aviisinik nassiussuisarnermut tapiissutaat unitsinneqarpoq, kommunit kattussuunnerannut atatillugu Namminersorlutillu Oqartussat AG-imi sulisussarsiortarnertik atorpiarunnaarpaat, naak aningaasatigut AG-mut annertuumik isertitsissutaasarsimagaluartoq. Piffissami tassani AG-mi sulisunik aamma soraarsitsiortuisoqarpoq, aviisilu sapaatip akunneranut marloriarluni saqqummertartoq sapaatip akunneranut ataasiaannarluni saqqummertalerpoq.

Aningaasarliornerup nalaani aamma, AG-p unammillertigisani Sermitsiaq illoqatigilerpaa.

Inga Dora. G. Markussen tunuarnini pillugu ima nassuiaateqarpoq.

- Taamani aallartikkama allanik suliaqarpunga, ullumikkut pisut ilungersunarput, tassami siornatigornit sulinerujussuuvugut. Soorunami tamakku, soraarninnut nipilersoqattaapput, Inga Dora G. Markussen oqarpoq.

Nunatsinni tusagassiorneq navianartorsiorpa?

- Taama isumaqarpunga, ajoraluartumik taama inissisimavugut. Annoncetigut sulisussarsiornerit nunatsinni ingerlanneqaratik maanna nunanut allanut nuunneqarnikuupput, taaamaammat kinguneqapilussinnaavoq nunatsinni demokratiip ingerlaneranut, Kalaallillu Nunaanni sulisussarsiortarneq eqqarsaatigalugu, Inga Dora G. Markussen oqarpoq.

Inga Dora G. Markussenip pilersaarusiortutut namminersortunngornissani siunertaralugu, AG suliffittut juunip 30-iani qimassallugu oqaatigaa.