Aaqqissuisoq: Aviisit kattunnissaat Atuagagdliutinut iluaqutaassaaq
Inga Dora Gudmundsdottir Markussen sulisunik soraarsitsisariaqarsimagaluarluni isumaqarpoq, kattunneq Atuagagdliutit nukittorsaatigissagaat, pissutsinullu alapernaattuunermini sanngiillinaviarani.
- Sermitsiap illuutaani tamatta suliffeqalissaagut, aaqqissuisoqarfiit immikkut sulliveqassallutik. Atuagagdliutit maannakkutut pissussia uagut pilliutiginianngilarput, Inga Dora Gudmundsdottir Markussen oqarpoq.
Isornartorsiutit sakkortugaluaqaat. Ilisimatusarfimmi Oqaasilerinermik, Atuakkialerinermut Tusagassiutilerinermillu Ilinniarfimmi ilinniartitsisoq Jette Rygaard oqarpoq, ataatsimuulerneq tamat oqalussinnaatitaanerannut, tusagassiutit assigiinngiiaarnerannut, tamallu oqartussaatitaneranni nakkutiginnittutut inissisimanermut ajoqutaanngitsoorsinaanngitsoq.
Kisianni Inga Dora Gudmundsdottir Markussen illuanik isumaqarpoq ataatsimuulerneq Atuagagdliutinut iluaqutaanginnassasoq.
- Kattuttussanngornitsinnik paasitinneqaratta, suleqatikka oqaloqatigaakka. Misigisimavugut sakkortunermik unammilissasugut.
Aviisi Atuagagdliutit maannamut sapaatit akunnerannut marloriarlutik saqqummertarpoq. Kisianni aappaagumiit ataasiaannarluni saqqummertalissaaq. Uagullu misissueqqisaarnissatsinnut piffissaqarnerulissaagut, taamaammallu Atuagagdliutit pitsaanerulersinnissaannut piffissaqarnerulissaagut, Inga Dora Gudmundsdottir Markussen oqarpoq.
