Aapparisimasaminik toqutsisoq eqqartuunneqarpoq

Angut 42-nik ukiulik, arnamik aapparisimasaminik toqutsisimasutut, Nuup Eqqartuussiviani ukiuni arfineq-marlunni pineqaatissinneqarsimasunut inissiisarfimmiittussanngorlugu eqqartuunneqarpoq.
Allattoq Elisa Isaksen
decembarip 11-at 2009 05:03

Qallunaap 42-nik ukiullip ukiormanna marsimi, aapparisimasani kalaaleq 34-nik ukiulik, toqqusassillugu toquppaa.

Taakku internetikkut attaveqaqatigiinnermikkut naapissimapput, angullu 42-nik ukiulik qaammatialunnguaannarni Nunatsinneereersoq toqutsineq pivoq.

Sermitsiami allaaserisaq naapertorlugu aappariit nakuusernertaqaqisumik aappariissimasut, politiillu arlaleriarlutik akuliuttarsimallutik. Aammami toqutsinerup nalaani aappariit qimareersimapput.

Angut 42-nik ukiulik marsimi killisiorneqarnermini oqarpoq, arnaq 34-nik ukiulik nammineq pisinnaanngikkuniuk allamit pineqassanngitsoq.

42-nik ukiulik Nuup Eqqartuussiviani unataasimasutut toqutsisimasutullu eqqartuunneqarpoq, pineqaatissinneqarninilu pillugu ulluni 14-ini eqqarsarfissaqarusulluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq