Aappariit timersornermi sullissisut nersornaatisipput

Timersornerup silarsuaani suliaqarluartut kikkut ukioq-manna akissarsitinneqassanersut Brugsenip toqqaqqammerpai.
Allattoq Carla Davidsen
juunip 05-at 2012 06:11

Aappariit Rita Egede aamma Kristian Heilmann, Nuummi GSS-imeersut, 100.000 koruuninik akissarsitinneqarput. Tusagassiuutinut nalunaarummi tamanna atuarneqarsinnaavoq.

Kalaallit Nunaanni Brugsenit nuna tamakkerlugu siulersuisuisa akissarsitinneqartussat taakku toqqarpaat, timersoqatigiiffik GSS-imi meeqqat inuusuttullu akornanni qasusueqalutik akissarsiaqarnatillu ukiorpassuarni sungiusaasimanerat tunngavigalugu.

- Namminneq piumassutsiminnik sulipput, akissarsiaqarnissaq pingaarnerutinnagu. Inuusuttulli meeqqallu assammik arsarnermi siuarsaavigineqarnissaat siunertarinerullugu. Tamannalu takussutissartalimmik sunniuteqarluarsimavoq, peqqinnartumik timersornikkut anguniagaqarnissaq meeqqat inuusuttullu ilikkarpaat. Tamannalu inuiaqatigiinnut ajunngitsumik aamma kinguneqarpoq, siulittaasoq tunualersoq, Akaaraq Samuel Olsen, oqarpoq.

Kristian Heilmann Rita Egedelu Brugsenip Nuummi ataatsimeersuarnerani 100.000 koruuninik akissarsitinneqaramik uissuummivoq.

- Ritalu Brugsenip akissarsiaritittagaanik tunineqaratta attortinnaqaaq. Piareersimaffiginngivipparpummi. Erseqqissaatigissavaralu klubimi kisitta sulisimannginnatta. Siuarsaanermi suleqatigisimasavut amerlaqaat, taakkulu qutsavissaqarfigaavut. Pisimasoq pillugu Rita, meeqqatta napparsimanerani angerlarsimasoq, oqaloqatigeriarlugu, aningaasat ilaat meeqqanik inuusuttunillu siuarsaanermut atorneqarumaarput, Kristian Heilmann qujassuteqarluni oqarpoq.