Qulaarpaa Aappariinnermi persuttaaneq eqqarsaatigilluagaasarpoq
Angutip arnaq uffarfimmut nillertumut nutsuppaa, kingornalu arnaq timaatigut aalajanngersimasumik tillualerlugu. Tilluusat atisanit toqqorneqarsinnaatillugit timaatigut attorpaa. Tilluusassat nillertumik kuutsitsiffigineqarnerisa ersippiartissanngilai.
Toqqusassiineq nalinginnaasuuvoq
Assersuusiorneq eqqoriaanerinnarmik tunngaveqanngilaq, aappariinnermili persuttaanernit assigiinngitsunit nassuiaatigineqartunik tunngaveqarluni. Tamassumalu erseqqissumik takussuserpaa, persuttaasarneq tassanngaannartumik kamassarnerunngitsoq.
Angutip kamassernini aquppaa. Pingaartumik timitigut tilluaanerit tukertaanerillu atisanit toqqorterneqarsinnaasut arnanit oqaluttuarineqarsinnaapput. Allanit takuneqarsinnaaffimmi aamma kamasserneq-ajorput – persuttaasarneq angerlarsimaffimmi pisarpoq. Pissutsimmi ajunngitsup avammut takutinnissaa angummut pingaartuuvoq. Angutip alutorineqarnera nuannarineqarneralu qaqutigoortuunngilaq.
Arnaq toqunniarlugu sioorasaarpaa
Persuttaanerup avatanngiisinit amerlanertigut takuneqarsinnaannginnera isumaqanngilaq ajoqutaanngitsoq. Illuatungaatigulli aappariinneq persuttaaffiusoq amerlanertigut aaqqissuussamik naalliuutsitsinerulersarpoq, amerlanertigullu inuunermik navianartorsiortitsininngortarluni. Allaammi toqqusassiineq nalinginnaalertarpoq. Tamanna allakkani arlaleriarluni allaatigineqarpoq, KNR-imilu misissuinitsinni arnat naapitagut arlallit oqaluttuarput, ilisimajunnaarnissap tungaanut angutinit toqqusassinneqartarlutik. Toqqusassiinermilu oqaatigineqarsinnaasarpoq angut piumaguni arnaq toqussinnaagaa. Tamassuma aamma takutippaa, angutip persuttaanini nammineq aqukkaa – taamatullu ajutoorsinnaaneq oqaatiginagu.
Oqaluttuarineqartoq alla, arnaq natermut igeriunneqarpoq, ajortumillu pinninneq tukkaanermik nanginneqarpoq. Angutip timimigut pissaaneqarnerunini takutikkusuppaa.
Tarnikkut naalliutsitaanermik aallartittarpoq
Persuttaanerujussuaq aappariinnerup ingerlanerani aatsaat pilersarpoq. Amerlanertigut aappariileqqaanermi arnaq ataavartumik isornartorsiorneqartarpoq. Naalanngippaluppallaartunik atisakkersortarluni imminullu pingaartinngippallaarluni arnaq oqarfigineqartarpoq. Qungujuffigisassarinngisaminut qunguttarluni, pinnersaatinik atuivallaarneragaalluni, iggarlulluni allarpassuarnillu oqarfigineqartarpoq. Sulaarsinnaajunnaariartortarporlu.
Kinguneratigut angut amerlanertigut utoqqatsissutissarsiussaaq assersuutigalugu qasoqqanerarluni, aalakoorami taamaaliorluni imaluunniit arnaq ajortisaarisimanerarlugu. Taamalu pisoqaqqinnavianngitsoq neriorsuisarpoq. Tamassumalu kingorna piffissami sivisuumi aappatsialaassaaq. Sianiutitigut naalliutsitsitsilernissap kamarujussuarnissallu tulliuttup tungaanut. Nalinginnaasumik pinerit tamaasa nakuusernermit kingullermit sakkortunerusumik. Naggataanilu aappariit tamanna tamarmik nalinginnaasutut isigilertarpaat.
Qimannissaa inuunermut navianarpoq
Arnap naalliutsitaanini aqunneqarninilu naammagilerlugu angut qimanniaraangamiuk amerlanertigut tamanna aatsaat ilumuuissumik navianarsisarpoq. Persuttaaneq suli ingasannerujussuanngortarpoq. Timip ilumiuisa aqqunartitinnginnerini angutip timikkut tukkaanini siusinnerusukkut unitsittarnikuugaluarlugu maannakkut uninneq-ajorpoq. Immaqa uninngitsuussaaq. Inuunerup erliginera peqqutigalugu annilaangatigisaqarneq arnap aappariinnerup persuttaaffiusup qimassinnaannginneranut peqqutinut ilaavoq.
Aappariinneq nakuuserfiusoq aqqusaarnikuuiuk oqaluttuarerusullugulu, taava attavigisigut doj@knr.gl imaluunniit wtu@knr.gl
