Aappaagumut saarullittassiissutigineqartut KNAPK-p pakatsissutigigai
- Tamanna ilumoorsinnaanngilaq, KNAPK-p siulittaasua Henrik Sandgreen, tusagassiuutinut nalunaarummi ilaatigut taama allaaserisaqarpoq.
Saarulleqassutsimmi qaffakkiartornera malinnaanerit tamavimmik takutikkaat, taassuma oqaatigaa:
- Paamiuniit Qeqertarsuup Tunua tikillugu aqqutaa tamaat saarullinnik "qalaarpoq", allaammi Kullorsuarmi saarulliit takornartaanngeqaat. Taamatut nalunaarput aalisartut sinniisaat sapaatip-akunnera una Nuummi ataatsimiittut, KNAPK-p siulittaasua oqarpoq.
AAMMA ATUARUK VIDEO KNAPK tunisinermi akit pillugit piumasaqaateqarnissaminut atatillugu misissuisitsisoq
Saarullittassiissutit taamaammat 25.000 tonsinit 45.000 tonsinut qaffanneqarnissaat KNAPK-p siunnersuutigaa:
- Tamanna piviusorsiornerusoq Henrik Sandgreen isumaqarpoq, atuisummi nuannaarutigisaannik saarulliit ukioqatigiiaat arlariit toqqammaviupput peqarluarneranut, Henrik Sandgreen oqarpoq.
Nioqqutissiorneq inerisaaffiussappat tulaassukkat qaffanneqartariaqartut taassuma erseqqissaatigaa, saarullittassat appasinnerat pissutaalluni nioqqutissiortut nioqqutissioriaatsinut nutaanut, soorlu tisaanut aningaasaliinissamut tunuarsimaartartut Henrik Sandgreen oqarpoq, utaqqiisaagallartumik umiarsualiisariaqartarnerit siunissami pinngitsoortinneqassappata saarullittassiissutinik qaffaasoqartariaqarnera tikkuarlugu.
